Gulong sa kariton ng ilang Baclaran vendors pinabaklas ng MMDA

ABS-CBN News

Posted at Jul 12 2019 06:56 PM | Updated as of Jul 12 2019 07:29 PM

Watch more in iWant or TFC.tv

Pinatanggal ng mga tauhan ng Metropolitan Manila Development Authority (MMDA) ang mga gulong sa mga kariton ng ilang nagtitinda sa Baclaran, Pasay City nitong Biyernes.

Kasunod ito ng utos ng lokal na pamahalaan ng Pasay na ipagbawal na ang paggamit ng de-kariton na stall sa lugar.

Ayon sa MMDA, isang buwan na nilang inaaraw-araw ang paggalugad sa Baclaran para malinis ito gaya ng nangyari sa Divisoria sa mga nakalipas na araw.

Pero aminado silang sakit sa ulo ang paglalagpas umano ng ilang vendor ng kanilang stall kapag nawala na ang mga enforcer sa araw-araw nilang clearing operations.

"Yung kalsada is 'crineate' para sa sasakyan, hindi naman sa vendors," ani Jun Vialu, commander ng MMDA Task Force on Special Operations.

Sa pag-arangkada ng operasyon ng MMDA, pinagtutulak ng ilang vendor palayo ang kanilang mga stall para hindi sila masita.

Pinabaklas din ng MMDA ang mga gulong ng mga stall na nakapirmi lang sa bangketa. Dahil dito, kusa ang paglalagari at pagsisira ng ilang vendor sa kanilang mga stall.

Pero may iilang vendor na ikinagulat ang bagong patakaran kahit ipinaalam na raw ito ng MMDA noong Huwebes. Isa sa nagulat si Mariel Manreyes.

"Hindi nga namin alam na magkakaganito," mangiyak-ngiyak na sinabi ni Reyes, na inutang lang umano ang kaniyang puhunan.

Ayon sa MMDA, maaari lamang magtayo ng tindahan sa kalsada ang mga vendor mula alas-6 ng umaga hanggang alas-6 ng gabi.
 
Pero gipit pa rin umano ito ayon sa ilang nagtitinda kaya pakiusap nila na habaan ang oras na puwede silang magtinda.

Umapela rin ang ilang vendor na isaalang-alang ang kanilang kapakanan at hindi lang ng mga sasakyan.

-- Ulat ni Anjo Bagaoisan, ABS-CBN News

Bisitahin ang Patrol.PH para sa iba pang mga balita.