Lalaking nagnakaw umano ng 2 luncheon meat arestado sa Maynila

Michael Joe Delizo, ABS-CBN News

Posted at Jul 06 2020 11:45 AM | Updated as of Jul 06 2020 08:14 PM

Watch more in iWantTFC

MAYNILA — Ikinulong ang 53 anyos na lalaki dahil sa pagnanakaw umano ng canned goods sa isang grocery store sa Paco, Maynila. 

Sa report mula sa Manila Police District, dinala ng security supervisor ng Super 8 Retail Systems, Inc. sa police community precinct (PCP) sa Paco ang suspek, na isang pedicab driver at residente sa Barrio Tejeros, Makati City. 

Batay sa report ng pulisya, bandang alas-11:30 ng gabi noong Biyernes nang mahuli ng guwardiya ang suspek sa pagtangay umano ng dalawang lata ng luncheon meat na nasa P381 ang halaga. 

Ayon naman sa Paco PCP, nakalabas na ng grocery store ang lalaki nang masita sa hindi binayarang produkto. 

Hinold muna ng pamunuan ng Super 8 ang lalaki para bigyan ng pagkakataon na makapagbayad, pero hindi umano dumating ang kanyang asawa para bayaran ang luncheon meat. 

Isinailalim sa medical check-up ang lalaki bago itinurn over sa Ermita Police Station. 

Umusad na rin ang inquest proceedings sa lalaki para sa kasong shoplifting at nakatakda siyang iharap sa Manila City Prosecutor's Office ngayong linggo.

Bisitahin ang Patrol.PH para sa iba pang mga balita.