PatrolPH

Chinese nahulihan ng hinihinalang shabu sa kahon ng face mask sa Mandaluyong

Anjo Bagaoisan, ABS-CBN News

Posted at Jul 02 2021 06:49 AM | Updated as of Jul 02 2021 06:59 AM

Watch more on iWantTFC

MAYNILA—Nasabat ang tinatayang higit P500,000 ng hinihinalang shabu mula sa isang lalaking Chinese na inaresto sa anti-drug operation sa Mandaluyong City, Huwebes ng hapon.

Target ng buy-bust ng Philippine Drug Enforcement Agency (PDEA) special enforcement service at PDEA Region 3 ang 30-anyos na Chinese na kinilala lamang sa pangalang Xu. 

Nagsagawa ng transaksyon sa lobby ng isang condominium sa Barangay Hulo na sinasabing tinitirahan ng suspek.

Nang maaresto siya, narekober ang 3 sachet ng umano’y shabu na nakasilid sa kahong lalagyan ng face mask.

Nasa 100 gramo ang timbang nito at P680,000 ang street value.

Ayon sa PDEA, 3 taon nang nakatira sa Pilipinas si Xu at nagtrabaho sa Philippine offshore gaming operations, pero natanggal sa trabaho.

Nahaharap ang Chinese sa kasong paglabag sa Dangerous Drugs Act.

Inaalam rin ng PDEA ang pinagkunan niya ng supply ng droga. 

Bisitahin ang Patrol.PH para sa iba pang mga balita.