PatrolPH

Rehearsal para sa inagurasyon ni Marcos puspusan na

ABS-CBN News

Posted at Jun 29 2022 01:46 PM | Updated as of Jun 29 2022 07:47 PM

Watch more News on iWantTFC

(UPDATE) Puspusan ang rehearsal sa gagawing programa para sa inagurasyon ni President-elect Ferdinand Marcos Jr. sa National Museum sa Maynila ngayong Miyerkoles, isang araw bago ang mismong event.

Sa huling rehearsal, nagkaroon ng simulation ng pagdating at panunumpa ni Marcos.

Inawit din ng singer at TV host na si Toni Gonzaga ang "Lupang Hinirang" habang kinanta naman ni Cris Villonco ang "Pilipinas Kong Mahal" kasama ang Young Voices of the Philippines Choir.

Sabay-sabay ulit na nagmartsa ang mga tauhan ng Philippine National Police at Armed Forces of the Philippines na lalahok sa military at civic parade, suot ang mga uniporme na gagamitin nila sa Huwebes.

Magiging bahagi rin ng programa ang mga medical frontliner, overseas Filipino worker, atleta at mga manggagawa sa sektor ng transportasyon, agrikultura, konstruksiyon at edukasyon. Kasama rin pati mga kabataan.

Buo ang gagamiting stage at naitayo na rin ang tent sa harap nito, habang nasa gilid naman ang mga LED wall na may mga speaker.

Nakahilera na rin ang mga upuan ng mga VIP na may pinturang kulay gold at naglagay ng mga portable toilet sa paligid.

Ayon sa organizer na si Franz Imperial, may nakalatag namang Plan B sakaling umulan sa Huwebes.

"It's 95 percent there as you can see, kaunting ano na lang doon sa stage, kaunting tweaking na lang," ani Imperial.

"We're preparing a Plan B. We're discussing it... most likely indoors (National Museum)," dagdag niya.

Nakalatag na rin ang security plan ng Philippine National Police (PNP).

Muli rin silang nagpaalala sa mga magpoprotesta na sa mga freedom park lang ito puwedeng gawin at hindi papayagang makalapit sa National Museum.

Kasama rito ang Liwasang Bonifacio, Plaza Miranda, Plaza Moriones at Plaza Dilaw, ayon kay Maj. Gen. Valeriano de Leon, Director for Operations ng PNP.

Nagpaalala naman si De Leon sa mga supporter na dadalo na magiging mahigpit ang inspeksiyon sa mga dalang gamit.

Nag-abiso rin ang pulisya sa mga motorista na kung pupunta sa Maynila sa Huwebes ay planuhing maigi ang dadaanang ruta at iwasan na lang muna ang mga kalsada sa paligid ng National Museum dahil sarado ang mga ito.

— May ulat ni Raya Capulong, ABS-CBN News

Watch more News on iWantTFC
Bisitahin ang Patrol.PH para sa iba pang mga balita.