PatrolPH

Naiturok na COVID-19 vaccine doses sa Pilipinas higit 10 milyon na

ABS-CBN News

Posted at Jun 28 2021 01:30 PM | Updated as of Jun 28 2021 07:10 PM

Watch more on iWantTFC

(UPDATE) Umabot na sa higit 10 milyong doses ng bakuna kontra COVID-19 ang naiturok sa Pilipinas, base sa datos ngayong Lunes mula sa pamahalaan.

Higit 2.5 milyong indibidwal ang fully vaccinated na o nakatanggap ng 2 dose, habang higit 7.5 milyon naman ang naiturok na first dose.

Ayon kay vaccine czar Carlito Galvez, 250,000 doses kada araw na ang average na bilang ng mga bakunang naituturok sa Pilipinas.

Kung inabot umano nang 3 buwan bago naibigay ang unang 5 milyong doses, ang ikalawang 5 milyon naman ay naiturok na kahit hindi pa tapos ang kasalukuyang buwan. Marso 1 nang mag-umpisa ang pagbabakuna kontra COVID-19 sa Pilipinas.

Tiwala si Galvez na kayang mabakunahan ang hanggang 70 milyong indibidwal bago matapos ang 2021 para makamit ang herd immunity basta dumating sa bansa ang lahat ng biniling COVID-19 vaccine doses.

Nag-alok naman ang Valenzuela City ng tulong na magbakuna ng mga residente sa kalapit na probinsiyang Bulacan, ayon kay Mayor Rex Gatchalian.

Pero ito'y kapag natapos umanong bakunahan ang 70 porsiyentong populasyon ng lungsod bago matapos ang Nobyembre.

Malaking tulong din, ayon kay Galvez, sa pagpapabilis ng vaccination ang pagbabakuna ng nasa 300 pribadong kompanya.

Dumating na kasi sa Pilipinas noong gabi ng Linggo ang kauna-unahang batch ng mga COVID-19 vaccine mula Moderna, na binili ng pribadong sektor at gobyerno.

Sa halos 250,000 doses na lumapag sa Pilipinas, halos 100,000 ang binili ng mga kompanya sa pamamagitan ng International Container Terminal Services ng negosyanteng si Enrique Razon.

Karamihan naman ng Moderna vaccines ng gobyerno ay dadalhin muna sa mga lungsod sa Metro Manila, ayon kay Galvez.

Bibigyang prayoridad umano sa Moderna vaccines ang overseas Filipino workers, kabilang ang seafarers.

Dumating na rin nitong umaga ng Lunes ang dagdag na 1 milyong doses ng Sinovac vaccines, na ipapamahagi sa mga lugar na may mataas na kaso ng COVID-19 sa Visayas at Mindanao.

Sa kabuuan, nasa higit 17 milyong doses ng COVID-19 vaccines na ang natanggap ng bansa.

Sa susunod na buwan, inaasahang darating na ang nasa 500,000 doses ng Pfizer vaccines, na unang batch mula sa 40 milyong doses na binili ng gobyerno.

May 6.5 milyong Sinovac doses din, 250,000 doses ng Moderna at 1.17 milyong dose ng AstraZeneca ang nakatakdang dumating sa Hulyo.

Posibleng sa susunod na buwan din ang dating ng higit 2 milyong AstraZeneca doses mula COVAX Facility, at mga donasyong bakuna mula Amerika at Japan.

Wala pa ring petsa kung kailan ang delivery ng naantalang Sputnik V component 2.

Samantala, pinag-aaralan na ng mga eksperto kung ano ang pinakamabuting booster shot o third dose ng bakuna kontra COVID-19.

"Puwede ba itong dating bakuna? Puwede 'yong bagong bakuna o 'yong modified version? Actually 3 po ang pagpipilian diyan. Mayroon tayong guidelines from the [World Health Organization] para matukoy kung alin ang pinakamabuting third dose," ani Dr. Nina Gloriani ng vaccine expert panel.

Ayon kay Gloriani, lumalabas sa mga pag-aaral ngayon na umaabot ng higit 9 na buwan ang antibodies ng mga fully vaccinated individual.

Sinusundan aniya nila ang mga pag-aaral abroad kung aabot pa ito hanggang 1 taon.

— May ulat ni Vivienne Gulla, ABS-CBN News

RELATED VIDEO

Watch more on iWantTFC
Bisitahin ang Patrol.PH para sa iba pang mga balita.