PatrolPH

Bahagi ng condo sa QC, nasunog

Anjo Bagaoisan, ABS-CBN News

Posted at Jun 27 2022 04:40 PM | Updated as of Jun 27 2022 07:55 PM

MANILA (UPDATED) — Natupok ng sunog ang isang unit sa 17th floor ng isang condominium sa Brgy. South Triangle, Quezon City Lunes ng hapon.

Ayon sa Bureau of Fire Protection (BFP), sumiklab ang apoy sa Room 1703 ng La Breza Tower sa Mother Ignacia Avenue bandang alas-2 ng hapon.

Umabot sa ikalawang alarma ang sunog na agad nirespondehan ng halos 40 trak ng bombero. Umulan pa sa kalagitnaan ng pag-aapula.

Tuluyang naapula ang apoy bago mag-alas-3:30 ng hapon—mahigit isa’t kalahating oras mula nang sumiklab ito.

Kabilang sa mga inilikas ng mga residente mula sa matataas na palapag ang kanilang mga alagang hayop.

Binitbit ni Raf Marabut na taga-18th floor sa iisang bag ang 2 alagang pusa at 4 na kuting, bukod pa sa kanyang aso.

“Medyo napansin kong nasusunog sa 17th, lumakas na pala noong chineck nila. Tapos biglang lumalakas noong pina-evacuate kami. Medyo andami kong pets na dala kaya natagalan ako, muntik nang ma-stuck doon.”

Inakyat ng mga bombero at responder ang mga kuwarto sa matataas na palapag ng gusali para ilikas ang mga tao sa pamamagitan ng fire escape.

Wala naman sa nasunog na kuwarto ang 3 nakatira rito dahil nasa trabaho. Nakabalik na lang sila matapos maapula ang apoy.

Inaalam pa ng BFP ang sanhi ng apoy at halaga ng natupok.

Sabi ni Cherry Mae Baguio, ang administrative officer ng gusali, ligtas ang lahat ng nakatira o tumutuloy sa 21-floor condominium.

Ayon naman sa mga unang rumesponde, may nasugatang matandang lalaki sa gitna ng paglilikas nang matapilok sa hagdanan.

Pansamantala namang tumuloy sa barangay hall ng South Triangle ang ilang lumikas.

Bisitahin ang Patrol.PH para sa iba pang mga balita.