Petition for prohibition sa batas na naghahati sa Palawan sa 3 probinsya, inihain

ABS-CBN News

Posted at Jun 27 2019 09:08 PM | Updated as of Jun 28 2019 11:21 PM

Naghain ang mga residente ng Puerto Princesa nitong Huwebes ng petisyon na itigil muna ang pagpapatupad ng batas na naghahati sa Palawan sa 3 probinsya. Kuha ni Cynthia Sumagaysay-Del Rosario

PUERTO PRINCESA—Naghain ang mga residente ng Puerto Princesa nitong Miyerkoles ng petisyon sa Korte Suprema na itigil muna ang pagpapatupad ng batas na naghahati sa Palawan sa 3 probinsya.

Humiling ang mga residente ng writ of prohibition with preliminary injunction, at temporary restraining order kaugnay sa Republic Act No. 11259 o “An Act Dividing the Province of Palawan into three provinces, namely: Palawan del Norte, Palawan Oriental and Palawan del Sur."

Kasama ang Commission on Elections, Department of Budget and Management, Provincial Government of Palawan, at ang Provincial Treasurer ng lalawigan sa inireklamo.

Naniniwala ang mga petitioner na "unconstitutional" ang batas dahil sa paglabag umano sa karapatan ng mga taga-Puerto Princesa na makibahagi sa plebisito sa 2020.

Nakasaad daw kasi sa Section 54 ng Republic Act na sadyang dinidiskwalipika ang mga taga-Puerto Princesa na bumoto sa plebisito.

"May political boundary na tinatawag at apektado rin kami, economically speaking, kasi kung inyong susuriin, ang Puerto Princesa ay capital ng Palawan. Dahil sa lokasiyon nito sa gitna [ng Palawan], ang kapitolyo hanggang sa ngayon ay [ang] Puerto Princesa City,” ani Cynthia Sumagaysay-Del Rosario, isa sa mga petitioner.

Binago rin umano ng nasabing batas ang regulasyon sa natural wealth sharing ng lalawigan.

Kung pagbabasehan ang kasalukuyang Local Government Code ng lalawigan, 20 percent na share ang mapupunta sa probinsiya, 45 percent sa munisipyo, at 35 percent sa barangay. 

Pero sa batas ng paghahati ng Palawan, ang barangay ay may 16 percent, 24 percent sa munisipyo at 60 percent sa probinsiya.

"[Maraming opisyales] ng maraming barangay ang aking natanong at ang sinasabi talaga nila, hindi nila alam ’yung parte sa usapin ng sharing ng natural wealth,” ani Beatriz Dioso, isa sa mga nag-petisyon.

Iginigiit din ng mga petitioner na hanggang sa deliberation sa Kongreso ng RA 11259 ay walang public consultation o public hearing para sa mga mangingisda, katutubo, magsasaka, kabataan, academic institutions, kababaihan at people's organizations.

Tila minadali ang batas, ayon sa mga residente.

“You cannot call that as public consultation because that is a political consultation. When you say, public consultation kasi, binibigyan mo ng panahon ’yung mga tao na mapakinggan ’yung kung ano ’yung magiging epekto sa kanilang pamumuhay nu’ng batas na iyong isinusulong sa Senado.” ani kay John Vicent Colili, isa sa mga petitioner. 

Ayon sa mga residente ng lalawigan, ginagamit din daw ang pondo ng gobyerno sa pangangampanya ngayon ng provincial government na mas pumapabor sa paghahati ng Palawan. 

Nakikiusap ang mga petitioner sa mga Palaweño na basahin at pag-aralan ang batas, alamin ang epekto nito upang may basehan ang pagboto sa plebisito sa susunod na taon. — Ulat ni Lynette Dela Cruz, ABS-CBN News

Bisitahin ang Patrol.PH para sa iba pang mga balita.