PatrolPH

Pangulong Duterte, inaasahang dadalo sa ‘Salamat, PRRD’ thanksgiving concert

Anjo Bagaoisan, ABS-CBN News

Posted at Jun 26 2022 06:08 PM | Updated as of Jun 26 2022 10:58 PM

MAYNILA - Dumagsa na ang mga tagasuporta ni Pangulong Rodrigo Duterte sa Quirino Grandstand sa lungsod ng Maynila para sa "Salamat, PRRD" na pagpapasalamat para sa nakaraang 6 na taong panunungkulan ng pangulo.

Inaasahang dadalo si Duterte at magsasalita sa concert na pagtatanghalan ng mga artista at mang-aawit.

Ayon sa direktor ng event na si Njel De Mesa, pagpapasalamat lang sana ito ng mga volunteer at supporter sa pangulo sa pagtatapos ng kanyang termino, pero hindi nila inasahang dadalo rin ang pangulo sa event.

Matatandaang dito rin sa Quirino Grandstand ginanap ang miting de avance ni Duterte noong halalan 2016.

Kabilang sa mga dumating dito ngayong maghapon ang ilang mga tagasuporta mula sa Metro Manila at ibang mga lugar, ang ilan mga dala pa ang mga anak.

Lahat sila may pagpapasalamat sa pangulo sa ilang mga naging accomplishment nito sa termino, kabilang anila ang drug war at pagsugpo sa krimen, ang “Build, Build, Build” infrastructure program, at maging ang Manila Bay dolomite beach, na binisita pa ng ilan bago tumuloy dito sa Quirino Grandstand.

Kabilang sa mga kakanta sa concert sina Freddie Aguilar, Florante, Martin Nievera, Jed Madela, Ice Seguerra, Andrew E., Robert Seña, Isay Alvarez, Dulce, at iba pa.

Magsisilbing host sina Arnell Ignacio, Bayani Agbayani, at Marielle Rodriguez-Padilla.

Dadalo rin ang ilang mga opisyal ng gabinete at maging mambabatas, ayon kay De Mesa.

Sabi ng mga organizer inaasahan nilang aabutin ng 3,500 katao ang dadalo sa lugar pero may espasyo naman kung sakaling dumami pa ito.

Watch more News on iWantTFC
Bisitahin ang Patrol.PH para sa iba pang mga balita.