Flashfloods tumama sa ilang bahagi ng Pampanga, Bataan, Tarlac

Gracie Rutao, ABS-CBN News

Posted at Jun 25 2020 10:32 PM

Tinamaan ng malakas na hanging at ulan ang ilang bahagi ng Central Luzon nitong Huwebes, Hunyo 25, 2020. Kuha ni Joyce Anne Domasian

CLARK - Malalakas na hangin na may kasamang mahina hanggang katamtamang lakas ng ulan ang naranasan Huwebes ng hapon hanggang gabi sa iba't ibang bahagi ng lalawigan ng Pampanga.

Nakaranas din ng malakas na pag-ulan ang ibang residente sa Capas, Tarlac, partikular na sa Barangay Cutcut 2, na nilimas ng
tubig dala ng umapaw na mga kanal.

Malakas na ulan din ay nakapagdulot ng flashflood sa Barangay Balon Anito, Mariveles sa Bataan. Hirap din ang mga motorista dahil sa baha sa daan sa Barangay Poblacion sa naturang bayan.

Ayon sa PAGASA, walang ibang weather system kundi mga isolated thunderstorms ang nararanasan.

“Itong mga isolated thunderstorms, 'yun lamang sa ngayon ang nagbibigay sa atin ng pag-ulan. Malakas na hangin din po yan. Kung minsan may kasama pong yan na ipo-ipo, minsan naman po umuulan ng yelo,” ani Manuel Esguerra jr., chief meteorological officer ng PAGASA-Clark.

Inaasahang tatagal ng isa hanggang dalawang araw ang isolated thunderstorms sa ilang bahagi ng Central Luzon.

Bisitahin ang Patrol.PH para sa iba pang mga balita.