PatrolPH

Dating Pangulo Benigno 'Noynoy' Aquino pumanaw na sa edad na 61

ABS-CBN News

Posted at Jun 24 2021 01:24 PM | Updated as of Jun 24 2021 08:21 PM

Dating Pangulo Benigno 'Noynoy' Aquino pumanaw na sa edad na 61 1
Nagsalita si dating pangulong Benigno “Noynoy” Aquino III sa memorial mass na ginanap sa alaala ng kaniyang inang si dating Pangulong Corazon Aquino. Pumanaw nitong Hunyo 24, 2021 si Noynoy sa edad na 61. Jonathan Cellona, ABS-CBN News/File

MAYNILA (2ND UPDATE) - Pumanaw na si dating Pangulong Benigno "Noynoy" Aquino III ngayong Huwebes sa edad na 61, limang taon matapos ang kaniyang termino, ayon sa kaniyang pamilya. 

"It is with profound grief that on behalf of our family, I am confirming that our brother... died peacefully in his sleep," anunsiyo ng kaniyang kapatid na si Aurora Corazon "Pinky" Aquino-Abellada. 

Sinabi ni Aquino-Abellada na sa death certificate ng dating pangulo ay nakasaad na namatay ito dahil sa "renal disease secondary to diabetes" alas-6:30 ng umaga. 

Nitong umaga ng Huwebes ay iniulat na isinugod sa Capitol Medical Center ang dating pangulo, na nanungkulan mula taong 2010 hanggang 2016. 

Sabi naman ng dating tagapagsalita ng pamilyang Aquino at kaibigan nilang si Deedee Siytangco, tatlong beses sa isang linggo sumasailalim sa dialysis ang dating pangulo bilang paghahanda sa isang kidney transplant bago ito pumanaw. 

Naospital ito nitong Huwebes sa Capitol Medical Center. 

Watch more on iWantTFC

Si Aquino ang tanging anak na lalaki nina dating Senador Benigno "Ninoy" Aquino Jr. at dating Pangulong Corazon Aquino. Nagtapos siya ng bachelor’s degree sa Economics sa Ateneo de Manila University. 

Nanungkulan siya bilang kinatawan ng ikalawang distrito ng Tarlac mula 1998 hanggang 2007 at tumakbo sa pagka-senador noong Mayo 2007 elections at nanalo sa ika-6 na puwesto. 

Habang nasa Kamara, nagbitiw siya noong 2005 bilang Deputy Speaker for Luzon matapos sumama sa mga panawagan sa noo’y Pangulong Gloria Macapagal Arroyo na bumaba sa puwesto kasunod ng "Hello Garci" scandal. 

Watch more on iWantTFC

Nagpasya siyang tumakbo sa pagkapangulo, kahit wala umano ito sa plano, matapos ang pagpanaw ng kaniyang ina taong 2009 — dala-dala ang slogan na "Kung walang corrupt, walang mahirap" at ang "Daang Matuwid" na paraan na pamamahala. 

Nang manalo sa pagka-pangulo, inutos niya ang mahigpit na pagbabawal sa paggamit ng "wang-wang" sa mga sasakyan. Binansagan din siyang "PNoy" - "President Noynoy" o "Pangulong Noynoy." 

Kabilang sa malalaking tagumpay ng administrasyon niya ang average annual economic growth na pumalo sa mahigit 6 porsiyento na pinakamataas simula noong dekada ’70. 

Nanindigan din ang kaniyang administrasyon laban sa pag-angkin ng China sa teritoryo ng bansa na kalauna’y nauwi sa pagkapanalo ng Pilipinas sa Permanent Court of Arbitration sa The Hague sa Netherlands. 

Bukod pa rito ay nagkaroon ng peace agreement ang pamahalaan sa Moro Islamic Liberation Front (MILF) para sa pagtatatag ng Bangsamoro government.

Kabilang naman sa mga naging dagok na hinarap niya noon ay ang hostage-taking incident sa Luneta, ang pagtugon sa krisis matapos ang bagyong Yolanda, at ang Mamasapano massacre. 

Watch more on iWantTFC

 

 'TAHIMIK' NA NAKIPAGLABAN 

Pagkatapos ng kaniyang termino ay naging mailap sa publiko si Aquino. 

Bukod ito sa ilang piling pagkakataon gaya ng pagpunta niya sa Rizal Park noong Nobyembre 2016 para iprotesta ang paglagak sa labi ng dating pangulo na si Ferdinand Marcos sa Libingan ng mga Bayani, at Pebrero 2017 noong nakimartsa ito para sa anibersaryo ng People Power Revolution. 

Dati na ring nanawagan ang kaniyang kapatid na si Kris Aquino ng mga dasal nang hindi ito dumalo sa ika-36 na anibersaryo ng kanilang ama na si Ninoy Aquino. 

"I just ask you please include him in his prayers because he needs strength. I want a brother who stays healthy, who will be alive, because… He’s 59… Kilala niyo siya, sisiputin niya bawat event. The very fact na wala siya dito today, he's not okay. Maybe now, he knows you. He will never tell you that he's not okay," ani Kris. 

Dati na ring nagkapulmonya si Aquino, ayon dito. 

Bumuhos ang pakikiramay mula sa iba't ibang personalidad na naging kaalyado at nakatunggali niya sa kaniyang karera sa politika. 

Kabilang din sa mga nakiramay ang naging Bise Presidente ng kaniyang termino na si Jejomar Binay, at ang kapartido niyang tumatayo ngayong Bise Presidente na si Leni Robredo. 

Watch more on iWantTFC

 'KAIBIGANG TUNAY'

Maging ang ilang nakatrabaho at malapit sa buhay ni PNoy ay nagdalamhati sa pagpanaw ng dating pangulo. 

"Kaibigang tunay. We are deeply saddended by the passing of a dear friend. Our deepest sympathies and prayers are offered to kumareng Kris, Ballsy, Viel and Pinky. And to the rest of the Cojuangco and Aquino family," ayon sa mang-aawit na si Ogie Alcasid, na nagsulat ng kanta para sa presidential campaign ni Aquino noong 2010. 

Watch more on iWantTFC

Nakiramay rin ang iba pang celebrities online gaya nina Lea Salonga, Liza Soberano, at Angel Locsin. 

Para naman kay Sen. Panfilo Lacson, si PNoy ay isang kaibigang laging may panahong dumamay. 

"Even as president, he always managed to promptly respond to my messages, no matter how casual and trivial. It was indeed a privilege to have served with him – both in the Senate and the Executive, but more than that, to be his friend," ani Lacson. 

Kaibigan din ang paglalarawan ni Sen. Joel Villanueva sa pumanaw na dating pangulo. 

"Hindi lang po president o leader ang nawala sa akin. Not even a mentor or a friend. He is a brother to me. Kung nakilala po tayo bilang si TESDA man, siya po ang tunay na TESDA Godfather," ani Villanueva, na nanungkulang TESDA administrator sa ilalim ng termino ni Aquino. 

Maging si Sen. Imee Marcos, na mula sa pamilyang itinuturing na kalaban ng mga Aquino simula noong panahon ng kanilang mga ama, ay nagpaabot ng kaniyang pakikiramay. 

"I will always treasure the memories of our long years together as freshmen legislators and members of a tiny opposition. For beyond politics and much public acrimony, I knew Noynoy, the kind & simple soul. He will be deeply missed," ani Marcos sa isang pahayag. 

Watch more on iWantTFC

Nakidalamhati rin si Presidential Spokesperson Harry Roque sa mga naulila ni Aquino. Maaalala aniya ang dating Presidente sa kaniyang serbisyo sa bayan. 

"We are grateful for the former President for his contribution and services to the country, and we ask our people to offer a prayer for the eternal repose of the former Chief Executive. Rest in peace, Mr. President!" ani Roque. 

Naka-half mast ang mga watawat sa mga pangunahing tanggapan gaya ng Malacañang Palace, bilang pagdadalamhati sa pagnanaw ni Aquino. 

Nakatakdang ilibing si Aquino sa Heritage Park sa Taguig. 

Hindi pa masabi ngayon ng Malacañang kung mag-aalok si Pangulong Rodrigo Duterte na gawaran si Aquino ng isang state funeral. 

Nakidalamhati rin ang iba’t ibang grupo at bansa sa kaniyang pagpanaw, gaya ng European Union. 

— May mga ulat nina Mike Navallo, Pia Gutierrez, Willard Cheng, Sherrie Ann Torres, Jeff Canoy, Jervis Manahan, at Zandro Ochona, ABS-CBN News

Watch more on iWantTFC

 

Bisitahin ang Patrol.PH para sa iba pang mga balita.