5 kompanya hinahabol ng SEC dahil sa 'scam'

ABS-CBN News

Posted at Jun 11 2019 08:05 PM

Watch more in iWant or TFC.tv

Maliban sa Kapa Community Ministry, may 5 pang ibang grupong hinahabol ang Securities and Exchange Commission (SEC) dahil umano sa pag-scam. 

Kasama sa mga kompanyang tinututukan ng SEC ang Organic Agribusiness Ventures, Ada Farm and Agri Ventures, ALMAMICO (Alabel-Maasim Small Scale Mining Cooperative) / ALAMCCO (Alabel-Maasim Credit Cooperative), Rigen Marketing, at Ever Arm Any Marketing.

Ayon kay SEC Chairman Emilio Aquino, nangangako ng hanggang 600 porsiyentong interes ang mga nasabing grupo, na nag-o-operate sa Visayas at Mindanao.

Ibinahagi ni Aquino na nakatulong ang revised na Corporation Code and Securities Regulation Code ng bansa para bigyan ang SEC ng ngipin na habulin ang mga scammer.

"May mga mutations na rin eh, it's no longer Kapa. We have other religious groups propagating their own kind of schemes," ani Aquino.

Nakikipagtulungan na ang SEC sa Philippine National Police (PNP), Criminal Investigation and Detection Group at National Bureau of Investigation.

Nanawagan ang PNP sa mga nabiktima ng scam na maghain ng reklamo.

"Napakaraming complainants, hindi nga lang naidokumento pa so hindi pa lahat nare-reduce into formal complaint," ani PNP spokesperson Police Lt. Col. Bernard Banac.

Magugunitang ipinag-utos ni Pangulong Rodrigo Duterte ang pag-aresto sa mga opisyal ng Kapa Community Ministry dahil sa pagkakaugnay ng korporasyon sa investment scam.

Nauna na ring sinabi ng SEC na posibleng isa ang pag-scam ng Kapa sa pinakamalaking scam sa Pilipinas na aabot sa P50 bilyon ang nakuhang halaga.

--Ulat ni Bruce Rodriguez, ABS-CBN News

Bisitahin ang Patrol.PH para sa iba pang mga balita.