QC health dep't: RT-PCR test, rekisito bago ma-admit ang buntis sa ospital

Iginiit ng taga-Quezon City Health Department na kailangan talagang sumailalim sa RT-PCR test ng mga buntis bago sila ma-admit sa ospital sa lungsod.

Kasunod ito ng pag-viral ng isang video ng babaeng napaanak sa sasakyan ng napadaang Quezon City Task Force Disiplina matapos tanggihang i-admit ng isang ospital.

Ayon kay Lilia Borlagdan, chief ng City Health Department Midwifery Section, kailangan i-test ang buntis para sa COVID-19 upang maiwasan nitong mahawahan ang mga health worker at ibang pasyente ng ospital sakaling positibo.

Sakaling biglaang napaanak, hangga't maaari ay mayroon dapat na hiwalay o isolated tent sa labas para sa mga pasyente, ani Borlagdan.

Pinayuhan ni Borlagdan ang mga nagdadalantao na malapit nang manganak na magpa-swab test na dahil libre naman ito at kailangan lang i-schedule sa community-based testing center sa lungsod.

Ang taga-Quezon City Task Force Disiplina na si Ronessa Serna ang isa sa mga tumulong sa panganganak ng isang buntis, na pumara sa kanilang sasakyan para magpahatid sana sa isang lying-in clinic.

Aminado si Serna na natakot siya sa nangyari, lalo't wala silang gamit sa panganganak.

Nadala nina Serna ang mag-ina sa isang clinic para doon na tanggalin ang umbilical cord.

Ayon kay Serna, ikinuwento sa kaniya ng mag-asawa na tinanggihan ang mga ito ng ospital na pinuntahan nila dahil wala silang COVID-19 swab test.

Sa isang text message, sinabi ni Dr. Sabina Mendoza ng Rosario Maclang Hospital — ang tumangging ospital — na sumunod lang sila sa panuntunan ng Philippine Infectious Disease Society for Obstetrics and Gynecology.

Ayon naman sa mga barangay health worker sa Payatas, Quezon City, may 8 kaso na sa kanilang lugar ng mga buntis na tinanggihan ng mga ospital ngayong panahon ng COVID-19 pandemic.

Ang iba pa raw na buntis ay pinapayagan i-admit sa kondisyong kasama ng mga ito ang COVID-19 patients.

-- Ulat ni Zyann Ambrosio, ABS-CBN News

RELATED VIDEO