PatrolPH

Mga lumikas sa pagputok ng Bulusan nagsimula nang mag-uwian

Jose Carretero, ABS-CBN News

Posted at Jun 08 2022 02:04 PM | Updated as of Jun 08 2022 07:43 PM

Watch more News on iWantTFC

(UPDATE) Nagsimula nang umuwi sa kani-kanilang mga tahanan ang mga residente ng Juban, Sorsogon na lumikas matapos mag-alboroto ang Bulkang Bulusan noong Linggo.

Pasado alas-9 ng umaga ngayong Miyerkoles nang umpisahan ang decampment o pagpapauwi sa mga evacuee, na pinabaunan ng mga food pack pagkaalis ng evacuation site.

Ayon kay Juban disaster officer Arvee Lodronio, ligtas ang mga residente dahil nasa labas ng 4-kilometer danger zone ang kanilang mga bahay.

Inilikas lang sila dahil umano sa abo na bumagsak.

"'Yong number one reason po natin ay health reason kaya muna natin pina-evacuate. Priority ang mga matatanda, 'yong mga bata, may sakit sa baga, mga vulnerable sector," ani Lodronio.

Handa umano ang lokal na pamahalaang ilikas ulit ang mga residente sakaling pumutok muli ang bulkan.

"Hindi pa naman aalis 'yong iba nating personnel ng [Philippine National Police] at ng Army, naka-stand by pa sila," ani Lodronio.

Masaya umano ang mga evacuee na nakabalik na sila sa kanilang mga bahay pero hindi maiwasan na mangamba dahil sa banta sa kalusugan ng abo at patuloy na pag-iral ng Alert Level 1 sa bulkan.

Sa bayan ng Irosin, pinayagan nang magbukas ang mga resort simula umaga ng Miyerkoles.

Pansamantala kasing isinara ang mga resort nang iakyat ang Alert Level 1 sa bulkan.

"Masyadong malaki din po epekto sa sa 'min ng temporary closure po nang 3 araw," sabi ng resort receptionist na si Dimple Gocoyo.

Base sa monitoring ng Philippine Institute of Volcanology and Seismology (Phivolcs), 11 pagyanig ang naitala sa nakalipas na 24 oras. Nasa 1,241 metric tonnes per day naman ang binugang asupre ng bulkan.

Watch more News on iWantTFC
Bisitahin ang Patrol.PH para sa iba pang mga balita.