Ilang empleyado ng bus company na nawalan ng trabaho, humingi ng separation pay

Anjo Bagaoisan, ABS-CBN News

Posted at Jun 07 2021 02:26 PM

Nagprotesta ang nasa 30 dating manggagawa ng limang bus companies upang manawagan ng separation pay nitong Hunyo 7, 2021, sa EDSA Monumento, Caloocan. Anjo Bagaoisan, ABS-CBN News

MAYNILA - Sumabay sa rush hour ang kilos protesta ng nasa 30 mga nagpakilalang driver, konduktor at iba pang empleyado ng 5 bus company sa EDSA Monumento, Caloocan nitong Lunes ng umaga.

Panawagan ng grupo, mabayaran sila ng separation pay ng kanilang bus operator, lalo’t ilang buwan na silang walang trabaho.

Nagpakita sila ng mga placard sa magkabilang sidewalk ng EDSA at maging sa footbridge papunta sa sakayan ng EDSA bus carousel.

Ang mga kompanya nila na naka-base sa Quezon City ay naging bahagi na ng isa sa 2 consortium na nagpapatakbo ng mga biyahe sa EDSA Busway.

Ayon kay Donald Gensaya, hindi rin nila alam ang estado nila sa kanilang mga kompanya dahil hindi rin sila kinakausap ng kanilang mga amo.

Sinabihan kasi silang maghintay lang sa abiso mula nang magsimula ang busway system.

Apektado sa pagbabago partikular ang mga konduktor.

“Malinaw ‘yong pagbabago ng sistema ng transportasyon dito sa Metro Manila. Tanggap po namin ‘yan. Pero ang ‘di po namin kayang tanggapin, ‘yong balewalain kami ng mga operator, ‘yong mga employer namin. Iyon ang masakit e. Kaya nakikiusap kami,” sabi ni Gensaya.

Dagdag niya, lumapit na rin sila sa DOLE, DOTR at LTFRB. Pero wala pang tugon sa panawagan nila.

Ayon kay Engr. Rene Mapili ng Mega Manila Consortium Corporation na nagpapatakbo ng mga bus na bumibiyahe mula Monumento, hindi bahagi ng kanilang consortium ang mga nagkilos-protesta.

Matapos ang nasa isang oras ay tahimik ding umalis ang grupo.

Dahil Lunes, mahabang pila ang dinanas ng mga pasahero ng libreng pasakay ng EDSA Bus Carousel. 

Mula sa sakayan ng mga bus sa center island at sa footbridge sa kabilang lane ng kalsada, nagpaikot pa ang pila hanggang sa loob ng Benin Street.

Kasama sa mahabang pila ay ang hirap na masundan ang physical distancing lalo kapag umuusad at tumitigil ito.

Pero mula nang humaba ang pila kaninang alas-6 ay nabawasan na ito paglagpas ng alas-7.

Minamando ito ng mga enforcer ng Caloocan.

Tuloy-tuloy din kasi ang pagdating ng mga bus at napupuno agad sila. 

Watch more in iWantTFC
Bisitahin ang Patrol.PH para sa iba pang mga balita.