PatrolPH

Pagdagsa ng alamang sa dalampasigan sa Casiguran, Aurora nag-viral

ABS-CBN News

Posted at Jun 04 2021 06:21 PM | Updated as of Jun 04 2021 06:43 PM

Pagdagsa ng alamang sa dalampasigan sa Casiguran, Aurora nag-viral 1
Nakapanglalaway ang bumungad sa mga residente ng Barangay Cozo dahil sa alamang na halos bumalot sa dalampasigan sa Casiguran sa Aurora. Larawan mula kay Fronda Donna

MAYNILA - Gawing bagoong, okoy, pansahog sa gulay. 

Ilan lamang ito sa mga suhestiyon ng mga netizen matapos makita ang mga larawan ng alamang na halos bumalot na sa bahagi ng dalampasigan sa Casiguran, Aurora.

Sa ibinahaging mga larawan ng Facebook user na si Fronda Donna, nagtila buhangin ang alamang na halos matakpan ang dalampasigan sa bahagi ng Sitio Busok-Busok sa Barangay Cozo.

Ayon sa kanya, normal lang aniyang nangyayari ang ganito sa kanilang lugar lalo na sa panahon ng Hunyo.

Kuwento pa niya, kumuha lamang ng pang-ulam ang mga kaanak habang fresh pa ang alamang at hahayaan na lamang na anurin muli ng alon ang mga ito hanggang sa mawala.

Hindi rin aniya niya akalaing magiging viral ang mga larawan na nakuha lamang niya sa kaanak.

“Nagulat po ako kasi balak ko lang po talagang ipakita sa mga tinag ko kasi hindi pa po sila nakakita ng ganyan... nagulat na lang po ako viral na pala siya,” sabi niya sa panayam sa ABS-CBN News Biyernes ng hapon.

Simula nang ma-ipost niya sa Facebook ang mga larawan nitong Huwebes ay umani na ito ng higit 1.4K na shares, 242 comments at 487 reactions.

Karamihan sa netizens ay gustong makarating sa lugar habang ang iba ay nagbigay ng ideya kung paano mapapakinabangan ang alamang.

Pero para sa kaniya, mangga na lang ang kulang.

-Ulat ni Harris Julio

Bisitahin ang Patrol.PH para sa iba pang mga balita.