PatrolPH

COVID-19 testing sa QC barangay umarangkada kasunod ng umano'y protocol violation

Zyann Ambrosio, ABS-CBN News

Posted at May 31 2021 03:40 PM | Updated as of May 31 2021 07:16 PM

COVID-19 testing sa QC barangay umarangkada kasunod ng umano'y protocol violation 1
Members of the Quezon City Epidemiology and Disease Surveillance conduct COVID-19 swab testing for residents along Dupax Street in Barangay Old Balara on May 31, 2021, after 6000 people reportedly flocked to a charity food distribution event in the area and broke health and safety protocols last May 25. Mark Demayo, ABS-CBN News

MAYNILA (UPDATE) — Sinimulan ngayong Lunes ang 2 araw na COVID-19 swab testing sa mga residente ng Barangay Matandang Balara, Quezon City kung saan nabalewala umano ang health protocols.

Nasa 5 team ang nakatakdang magsagawa ng testing sa barangay simula alas-9 ng umaga hanggang alas-5 ng hapon ngayong Lunes. 

Nasa 6,000 tao ang target umanong ma-swab ng lokal na pamahalaan ng lungsod.

Ipinamahagi rin sa naturang lugar ang ayuda noong nakaraang linggo. 

Ayon kay Dr. Rolly Cruz, hepe ng Quezon City Epidemiology Division, agad ipapadala ang mga resulta sa laboratory para malaman kung sino ang magpo-positive at makapag-contact tracing agad.

Sagot ng lokal na pamahalaan ang testing para sa mga residente, na nagkakahalagang P3,000 kada isa.

Ayon kay Cruz, kasama naman sa pondo ng COVID-19 response ng lungsod ang pera para sa pagpapa-swab test ng mga taga-Matandang Balara.

Isa sa mga pumila para sa testing si Mariel Caboboy, na gustong matiyak kung nakakuha siya ng sakit, lalo't dikit nang dikit aniya ang mga tao noong pila para sa ayuda.

"Hindi ko pa masabi kung nahawa ako o hindi eh.... mas maganda na 'yong sigurado," sabi ni Caboboy.

Sa paunang ulat, lumabas na 5 sa mga dumalo sa pamamahagi ng ayuda ang nagpositibo sa sakit.

Samantala, para sa Quezon City Police District (QCPD), absuwelto si City Councilor Franz Pumaren — ang nag-organize ng pamamahagi ng ayuda — sa alegasyong walang tamang koordinasyon sa mga awtoridad ang pamamahagi.

Ayon sa QCPD, kompleto naman ang mga awtoridad na dumating sa pamamahagi kasama ang mga pulis, Task Force Disiplina, at mga marshall at purok leader.

Watch more on iWantTFC

Samantala, bantay-sarado ang isang compound sa Area 7 ng Barangay Matandang Balara dahil sa 54 taong positibo sa COVID-19.

Sa isinagawang contact tracing ng lokal na pamahalaan, isang taga-Cavite na positibo sa sakit ang nakipag-inuman noong Mayo 9 sa 5 taga-Area 7. Tatlo ang nagpositibo sa inuman.

Isa sa nahawang driver naman ang dumalo sa isang kasal noong Mayo 15. Labintatlo ang nagpositibo roon.

Nagkataon naman na dumalo sa bible study ang ilan sa naging bisita ng nasabing kasal.

Ayon kay Quezon City Mayor Joy Belmonte, magpapadala ang lokal na pamahalaan ng show-cause order kay barangay chairman Allan Franza dahil sa pagkalat ng sakit.

Inatasan naman ni Belmonte ang liga ng barangay na gumawa ng mga hakbang at higpitan ang pagpapatupad ng health protocols sa lungsod.

Nauna nang ipinag-utos ni Pangulong Rodrigo Duterte sa mga pulis na arestuhin ang mga pinuno ng mga barangay kung saan may nangyayari aniyang mga paglabag sa health protocol, gaya ng mass gathering.

RELATED VIDEO:

Watch more on iWantTFC
Bisitahin ang Patrol.PH para sa iba pang mga balita.