Alamin: Ano ang kaibahan ng 'terorismo' sa 'rebelyon'?

ABS-CBN News

Posted at May 27 2017 04:14 PM

Kasunod ng bakbakan sa pagitan ng puwersa ng pamahalaan at Maute group, madalas na ring nababanggit ang salitang ‘terorismo’. Ngunit, ano nga ba ang kahulugan nito at ang pinagkaiba nito sa salitang rebelyon?

Sa programang ‘Usapang de Campanilla’ ng DZMM, ipinaliwanag ni Atty. Claire Castro na mas malawak ang sakop ng terorismo kaysa sa rebelyon. 

Aniya, ang rebelyon ay isang kilos kung saan ang isang grupo ay nag-aalsa laban sa pamahalaan, at isa lamang ito sa mga sakop ng terorismo. 

Ang layunin ng rebelyon ay makuha ang isang teritoryo at pamunuan ito- isang hakbang na labag sa Konstitusyon.

Ang terorismo naman ay anumang kilos na puwedeng maghasik ng pananakot sa kapwa sa isang partikular na lugar upang makuha mula sa pamahalaan ang isang bagay na labag sa batas. 

Bukod sa rebelyon, sakop din ng terorismo ang piracy, mutiny, coup d'etat, pagpatay o murder, kidnapping at illegal detention, crimes involving destruction, arson o panununog, at iba pa.

Ayon pa kay Castro, "mas malala" ang parusa sa terorismo kaysa rebelyon. 

Bagama't habambuhay na pagkakabilanggo ang nakasaad sa batas na parusa sa mapapatunayang nagkasala ng rebelyon, maaari pa aniya itong bumaba sa 40 hanggang 20 taon base sa mitigating circumstances o mga pangyayaring maaaring magpagaan sa hatol.

Kapag naman napatunayan na nagkasala sa terorismo, 40 taon na pagkakakulong ang parusa at hindi na ito maaaring ibaba.

Bisitahin ang Patrol.PH para sa iba pang mga balita.