P5 bilyong halaga ng shabu, nasabat sa Valenzuela

Henry Omaga-Diaz. ABS-CBN News

Posted at May 26 2017 07:32 PM

Mahigit na P5 bilyong halaga ng shabu ang nasabat ng Bureau of Customs sa isang operasyon sa Valenzuela City nitong Biyernes.

Mismong ang Bureau of Customs ng Tsina ang nagtimbre kina Customs Commissioner Nicanor Faeldon tungkol sa shipment ng shabu.

Idineklarang roller ball na ginagamit sa printing shops ang cylinder na bakal na balot ng makapal na itim na goma.

Pero nang buksan ito, mahigit na 500 kilo ng shabu ang nadiskubre ng mga ahente ng Customs.

Nakasiksik ang mga ito sa loob ng 5 kapsulang bakal.

Sa unang pagsusuri, positibo na ito nga ay mga kristal ng shabu mula Tsina.

“Sa isang cylinder, mga 100 kilos ang nakasiksik. Bagong modus o high grade na shabu. Kapag hinaluan na at binenta sa kalsada may 5 bilyon [piso] ang halaga nito,” ani Faeldon.

Ito ang isa sa pinakamalaking huli ng shabu mula nang simulan ang anti-drugs war.

Ayon kay Faeldon, lalo nila ngayong hihigpitan ang pag-inspeksyon sa mga dumarating na cargo mula sa ibang bansa.

“Hindi ko alam kung nakakalusot na sila dati. Kita mo naman ang kapal ng bakal tsaka goma na hindi na-penetrate ng X-ray natin kaya huwag sanang magalit ang mga importers natin,” aniya.

“Magbubukas na kami para masiguro na tama 'yung mga deklarasyon.” 

Kinukuwestiyon na ang may-ari ng warehouse na binagsakan ng kargamento at maging ang consignee nito.

Bisitahin ang Patrol.PH para sa iba pang mga balita.