PatrolPH

'Nag-aagawan': Ilang survivor idinaing ang kawalan umano ng life jacket sa MV Mercraft 2

ABS-CBN News

Posted at May 25 2022 01:33 PM | Updated as of May 25 2022 05:19 PM

Watch more News on iWantTFC

MAYNILA (UPDATE) - Nanindigan ang ilang survivor ng nasunog na MV Mercraft 2 sa Quezon province na wala silang nagamit na life jacket nang tumalon mula sa barko. 

Ang iba pa nga raw na pasahero ay mga container ng krudo ang ginamit para pampalutang, paglalarawan ni Nova Realingo, isa sa mga survivor. 

“Wala po, wala pong life jacket. Talagang ako ay hawak lang ng anak ko. 'Yung iba po nagkagulo na sa side at kinuha na po nila yung mga container," ani Realingo. 

"'Yung container po na may mga krudo, tapos binuksan na nila at itinapon na nila yun laman ng container. Kaya talagang nagkagulo na."

Aabot sa 7 ang namatay habang higit 120 ang sinagip nang masunog ang nasabing ferry. 

Ayon naman sa survivor na si Wilfredo Llorico, nag-aagawan na ang mga tao sa mga timbulan. 

"Nag-aagawan mga tao para lang may makuhang timbulan. Wala namang life jacket doon sa aming inuupuan, wala," ani Llorico. 

Sinisiyasat na ng Philippine Coast Guard kung isa ang krudo sa mga sanhi ng mabilis na pagkalat ng apoy. 

"Pinapa-check nga namin sa Bureau of Fire [Protection], binigyan na namin ng directive, request yung Bureau of Fire na checking 'yung Mercraft para sa possible na mga liquids, hazardous materials, mga traces ba para malaman natin kung halimbawa kung may mga cargo na naging dahilan ng pagkasunog ng nasabing Mercraft," ani PCG Spokespeson Armand Baililio. 

Pero sagot naman ni Joel Merania ng Mercraft shipping lines na "imposibleng" walang life jacket sa loob ng seacraft. 

"Naka-set aside siguro sa isang side that time kasi naihagis ng mga crew," aniya. 

Bukod sa kawalan umano ng life jackets, pinagpapaliwanag ang Mercraft kung bakit may 22 na survivor na wala sa listahan ng manifesto. 

Sa tala ng lokal na pamahalaan ng Real, aabot sa 157 ang lahat ng sakay ng nasunog na Mercraft. 

Pero nang magsagawa ng validation ang siyudad, lumalabas na 125 lang na pasahero ang nasa manifesto at 10 ang crew, kaya may 22 pasaherong hindi nakalista. 

“Maganda pa rin palagi na lahat ng mga pasahero, kahit pa ito ay kamag-anak ng crew o kaya mga nakiusap, kailangang nasa manifesto," ani Balilo. 

Inaasahang sa loob ng 1 linggo matatapos ang imbestigasyon at kabilang sa inaalam ay kung nakasunod ang mga crew sa tamang pagresponde sa sitwasyon.

Isinusulong na ni Quezon First District Rep. Mark Enverga na imbestigahan sa Kongreso ang nasabing trahedya. 

“Kahapon ay kausap ko si Speaker Allan Velasco na baka pwedeng next week, makatapos ang canvassing [ng boto], ay motu proprio ay pagbigyan naman na magkaroon ng imbestigasyon ukol dito," ani Enverga. 

"Kasi ito ay pangalawang pagkakataon na trahedya na Mercraft. So y'un, hinihingan natin magbigay-linaw sa ating lahat kung ano nga po ang mga pagkakamali at kung may malalaki pang pagkakamali ang Mercraft," dagdag niya. 

Nagbigay ng pinansiyal na tulong ang tanggapan ni Enverga sa mga biktima ng trahedya. 

 -- Ulat ni Dennis Datu, ABS-CBN News

Bisitahin ang Patrol.PH para sa iba pang mga balita.