PatrolPH

Bahay ng barangay chairman sa Bulacan hinagisan ng granada

Anjo Bagaoisan, ABS-CBN News

Posted at May 24 2022 07:54 PM


MAYNILA - Nasira ng shrapnel ang ilalim na bahagi ng pick-up na pag-aari ng isang punong barangay sa San Ildefonso, Bulacan matapos tamaan ng pagsabog noong Lunes ng gabi.

Pinaniniwalaan ng pulisya na hinagisan ng hinihinalang granada ang bahay ng kapitan na si Allan Galvez sa Barangay Alagao.

Walang nasaktan sa pagsabog na nangyari bago maghatinggabi, pero nasa loob ng bahay noon ang kapitan at kanyang pamilya, ayon sa pulis.

Sa post-blast investigation na isinagawa ng Bulacan PNP Explosives and Ordnance Division, narekober ang debris, shrapnel at safety lever ng hinihinalang hand grenade .

Sabi ni Bulacan Provincial Police director Col. Charlie Cabradilla, batay sa paunang imbestigasyon, posibleng hinagis ang pampasabog mahigit 30 metro mula sa bahay ng kapitan at bumagsak ito sa ilalim ng sasakyan na nakaparada sa tabi ng bahay, kaya ito tinamaan ng pagsabog.

Ayon naman kay Police Maj. Marvin Aquino, acting chief of police ng San Ildefonso, naipadala na sa crime lab ang mga shrapnel para makumpirma ang uri ng pampasabog na ginamit.

Dagdag ni Aquino, walang naiulat na banta o kaaway ang kapitang si Galvez lalo noong election period.

Nakababatang kapatid si Galvez ng mayor-elect na si Gazo Galvez.

Pero sabi ni Cabradilla, iimbestigahan pa rin nila ang lahat ng posibleng motibo sa insidente, gaya ng personal o kaugnay sa trabaho ng kapitan o sa nagdaang halalan.

Kasama na rin sa imbestigasyon ng San Ildefonso PNP ang investigation unit ng Bulacan police provincial office para matunton ang mga salarin sa pagsabog. 

Bisitahin ang Patrol.PH para sa iba pang mga balita.