PatrolPH

P590 milyong halaga ng pekeng produkto nasabat sa Bacoor

ABS-CBN News

Posted at May 20 2022 11:48 PM

MAYNILA—Nasa P590 milyong halaga na mga counterfeit products ang nasakote ng Bureau of Customs sa isang storage facility sa Niog Road sa Bacoor City, Cavite.

Mga brand ng mga kilalang produkto ang mga nasamsam. Meron ding mga construction supplies, power tools, marine at telecommunication devices, at mga pagkain ang nakuha sa operasyon.

May nakuha ding dalawang container nang tinatawag na infringing goods.

Inabisuhan ang may-ari ng warehouse at container na magpakita ng importation documents at permit sa mga nakuhang produkto.

Magpapatuloy ang imbestigasyon sa iba pang posibleng paglabag, tulad ng Intellectual Property Code of the Philippines at ang Customs Modernization and Tariff Act.

Samantala, kahon-kahong mga pinaniniwalang pekeng sigarilyo ang nakumpiska ng pulisya sa Damar Village, Quezon City, Biyernes ng hapon.

Mga pekeng brand ng kilalang sigarilyo ang laman ng mga kahon.

May mga brand din ng sigarilyo mula sa ibang bansa.

Arestado ang may-ari ng mga sigarilyo na isang Chinese.

Ayon sa driver ng Chinese na si Remelito Ponce, dinedeliver nila sa iba ibang lugar ang mga sigarilyo, kagaya sa Olongapo at Nueva Ecija.

Hindi niya raw alam na ilegal ang ginagawa ng kaniyang amo.

“Hindi ko alam na original o peke , basta pinag-drive lang ako dito,” ani Ponce.

Nagkakahalaga ng P4.5 milyong piso ang mga sigarilyo, ayon sa Criminal Investigation and Detection Unit (CIDU) ng Quezon City Police District.

Tumanging magbigay ng pahayag ang Chinese dahil hindi raw siya nakakapagsalita ng Tagalog at English.

Mahaharap sa patong patong na kaso ang suspek tulad ng paglabag sa Consumer Protection Act, Intellectual Property Law at paglabag sa Internal Revenue Code.

Posible umanong sa Pilipinas na ginagawa ang mga sigarilyo at posibleng galing din sa China ang ilan sa mga ito.

Aalamin din ng CIDU kung legal ang pagpasok sa bansa ng dayuhan.—Ulat ni Jose Carretero, ABS-CBN News

KAUGNAY NA ULAT

Watch more News on iWantTFC
Bisitahin ang Patrol.PH para sa iba pang mga balita.