PatrolPH

Ilang local officials may agam-agam sa di pag-anunsiyo ng vaccine brand

ABS-CBN News

Posted at May 20 2021 03:46 PM | Updated as of May 20 2021 07:59 PM

Watch more on iWantTFC

MAYNILA - May agam-agam ang ilang local officials sa utos na huwag sabihin ang brand na gagamitin sa pagbabakuna kontra coronavirus disease (COVID-19). 

Tinutulan ni League of Provinces of the Philippines National President Presbitero Velasco Jr., na gobernador ng Marinduque, ang rekomendasyon. 

Ani Velasco, hindi tama at paglabag sa karapatang pantao ang hindi pagbanggit ng detalye sa bakunang ituturok sa mga mamamayan. 

Dapat ding alam ng magpapabakuna ang mga risk ng pagturok sa kaniya at hindi ito puwedeng puwersahin kung ayaw. 

May karapatan din aniyang tumangging magpabakuna ang isang indibidwal kung ayaw niya ang brand na ituturok sa kaniya. 

"'Yan po ay hindi puwedeng hindi sabihin 'yun. Meron pong right of informed consent at karapatan po ng kahit sinong tao, ng bawat Pilipino na malaman ano 'yung risk doon sa gamot na i-inject sa atin o kaya anong benefit at ano ba 'yung mga alternatibong puwedeng gamitin. Karapatan ho 'yan, di puwedeng alisin, human rights ho 'yan," ani Velasco, na dating mahistrado sa Korte Suprema. 

Para kay Marikina City Mayor Marcy Teodoro, mahalagang alam ng mga mamamayan kung anong uri ng bakuna ang gagamitin sa kanila. 

Paliwanag ni Teodoro, limitado naman ang pagpipilian sa kung anong mga bakuna lang ang meron ang lokal na pamahalaan. 

Dapat din aniyang mahigpit na magpatupad ng pre-registration system imbes na hindi ianunsiyo ang brand ng bakuna. 

"Ang pinakamahalaga lang sa atin ay informed 'yung consent, 'yung naiintindihan ng mga kabababayan natin kung ano 'yung available na puwede nilang pagpilian at kung gugustuhin nila, they could proceed with vaccination at kung hindi naman puwede silang maghintay kung kelan maging available. It does not follow eh, kung babanggitin mo o hindi mo babanggitin eh," ani Teodoro. 

Iniutos na rin ng Department of the Interior and Local Government (DILG) na huwag nang ianunsiyo ang brand ng bakunang gagamitin sa vaccine site para maiwasan ang dagsa ng tao sa vaccination sites. Inirekomenda rin ito ng Department of Health (DOH). 

Pero nilinaw ng DILG na malalaman ng indibidwal sa vaccination site kung anong brand ng COVID-19 vaccine ang ituturok sa kaniya. 

"Doon sa araw mismo, pagdating ng indibidwal ay kung magtatanong siya, kailangan sabihin sa kanya, dahil that's part of the rights of the 'patient,'" ani DILG Undersecretary Jonathan Malaya. 

Dumepensa naman ang DOH sa rekomendasyon. Ayon kay DOH Undersecretary Maria Rosario Vergeire, layon nitong maiwasan ang pagdagsa ng mga tao sa vaccination site na posibleng maging sanhi pa ng pagkalat ng COVID-19. 

Ayon pa kay Vergeire, kaunti pa lang ang dumarating na bakuna ng Pfizer at lahat naman ng bakunang inoorder ng pamahalaan ay epektibo. 

"Ang nangyari po kasi for these past days nu'ng nag-announce 'yung ilang LGU about a specific brand of vaccine dinagsa po at talagang nag-crowd po ang mga tao na napakadelikado po talaga niyan. 
Pangalawa po parang nagkaroon at nakita talaga na 'yun ang gusto nilang bakuna which is very wrong. Kasi po hindi naman ganoon kadami 'yung supply natin ng ganyang bakuna at katulad nga ng sinasabi namin lahat po ng bakuna na 'yan pantay-pantay pag binigay sa atin, ito'y magiging epektibo pa rin sa atin," ani Vergeire.

Maaalaala na mahabang pila ang inabot sa mga vaccination site na nagtuturok ng mga bakuna ng Pfizer kontra COVID-19. 

Watch more on iWantTFC

Suportado naman ng ilang lokal na pamahaalaan tulad ng Pasay City ang posisyon na ito at sinabing ang pamimili ng bakuna ay dahilan ng mabagal na rollout. 

"Kaugnay nito ay suportado po ng ating lokal na pamahalaan ang pahayag ni Pangulong Duterte na hindi na dapat mamili kung anuman ang bakuna na nais nating gamitin at iturok sa atin," ani Pasay City mayor Emi Calixto-Rubiano. 

Susunod naman ang San Juan City sa utos ng DILG. 

"San Juaneños scheduled for their inoculation will know the brand of vaccines on the day of their vaccination as this is indicated in their vaccine card. If they are not comfortable with that particular brand, they can opt not to get vaccinated. To increase the number of vaccinees, we educate and inform our constituents about the facts regarding the vaccines. This our way of encouraging them to get vaccinated. Vaccination is purely voluntary, we do not force our people to get inoculated, more so with a brand that they do not like" ani San Juan Mayor Francis Zamora. 

Ang Navotas City, iaapela ang direktiba ng DILG dahil may ibang paraan naman umano para maiwasan ang pagdagsa ng tao kahit ianunsiyo ang brand ng bakuna. 

"Gusto natin magtiwala ang mga tao sa proseso ng bakuna. Mas magtitiwala ba sila kapag hindi nila alam kung anong brand ng bakuna? Natural po na hindi sila magtitiwala at magkakaroon pa sila ng distrust o pagdududa. Number 2, ang pagbabakuna ay purely voluntary. Kasama po noon ay ang karapatan ng tao na pumili ng bakuna," ani Navotas Mayor Toby Tiangco. 

Sa ngayon ay aabot ng 3,299,470 ang bilang ng mga nababakunahan kontra COVID-19. Dito, 786,528 ang fully vaccinated na. 

Kailangang mabakunahan ang 70 milyong katao para makamit ang herd immunity sa Pilipinas. 

-- May mga ulat ni Adrian Ayalin, ABS-CBN News

Bisitahin ang Patrol.PH para sa iba pang mga balita.