PatrolPH

Drive-thru COVID-19 vaccination isinagawa sa ilalim ng tulay sa Rizal

ABS-CBN News

Posted at May 18 2021 01:54 PM

Drive-thru COVID-19 vaccination isinagawa sa ilalim ng tulay sa Rizal 1
Sa ilalim ng isang tulay nagsasagawa ng drive-thru COVID-19 vaccination sa bayan ng Rodriguez, Rizal. Adrian Ayalin, ABS-CBN News

Sinimulan ngayong Martes ng Rodriguez, Rizal ang drive-thru COVID-19 vaccination nito, na isinagawa sa ilalim ng isang tulay.

Ayon kay Dr. Maria Carmela Javier, municipal health officer, makakatulong ang drive-thru vaccination para mapabilis ang pagbabakuna sa bayan, lalo't may 600 vials sila ng AstraZeneca vaccine na nakatakdang mag-expire sa Hulyo.

Bukod sa drive-thru vaccination, may ibang team din ang municipal health office na nagbabakuna sa mga covered court at iba pang open space.

"Mas safe ito kasi basta sa isang kotse hindi sila nagsisiksikan dahil isa rin ['yan] sa puwedeng mag-spread ng virus," ani Javier.

"We see to it na naka-face mask at face shield kung nasa loob sila ng sasakyan," dagdag niya.

Mas kumportable naman umano ang ilang senior citizen sa drive-thru vaccination.

"Mas madali ito at safety, kaysa pumila," sabi ng 69 taong gulang na si Consuelo Guino.

"Mas maganda po kasi hindi nagkaka-dikit-dikit ang tao, hindi masyadong crowded, may social distancing," sabi naman ng nagpabakunang si Tony Francisco.

Target ng pamahalaan na mabakunahan ang 70 milyon sa Pilipinas bago matapos ang taon para makamit ang herd immunity laban sa COVID-19. Base sa huling ulat, 2.9 milyon dose pa lang ng COVID-19 vaccines ang naituturok.

RELATED VIDEO:

Watch more on iWantTFC
Bisitahin ang Patrol.PH para sa iba pang mga balita.