PatrolPH

Ilang nagmomotorsiklo sumemplang sa EDSA sa gitna ng ulan

Anjo Bagaoisan, ABS-CBN News

Posted at May 17 2022 10:36 PM

MAYNILA - Sugatan ang hindi bababa sa 5 motorcycle rider nang madulas at sumemplang sa EDSA Balintawak sa Quezon City habang bumubuhos ang ulan Martes ng hapon.

Nirespondehan ng mga enforcer ng Inter-Agency Council for Traffic (i-ACT) ang mga sumemplang na rider, na kabilang ang isang pulis.

Nagkagalos ang karamihan sa mga rider, ang isa nasugatan sa tuhod.

Ayon sa i-ACT, pawang nadulas ang mga rider sa steel road plate sa tapat ng EDSA Balintawak Busway.

Ito ang ginagamit na pantakip sa ilang bahagi ng kalsada, pero nagiging madulas kapag nababasa.

Kaya nagpaalala ang i-ACT sa mga rider na kung kaya ay iwasang daanan ang mga bakal na road plates.

Kalakip na rin ang paalala nila sa lahat ng motorista na magdahan-dahan sa pagmamaneho lalo tuwingn masama ang panahon.

Nakikipag-uganayan naman ang task force sa iba pang ahensya kung ano ang aksyon na pwedeng gawin sa mga steel road plate nang hindi makadulot muli ng sakuna.

Limang oras na ring tuloy-tuloy ang pag-ulan sa Quezon City.

Pero mula kaninang alas-6:30, hindi na ito malakas.

Nagdudulot naman ang pag-ulan ng pagbagal pa rin ng traffic sa ilang bahagi ng Commonwealth.

Ayon sa Metropolitan Manila Development Authority (MMDA) Metrobase kaninang 7:50 ng gabi, lumuwag na ang EDSA southbound mula Cubao papuntang Shaw, pero may build-up ng mga sasakyan sa may kanto ng Boni Avenue papuntang Magallanes.

Sa northbound lane, heavy traffic pa mula Ayala Avenue papuntang Ortigas, pero maluwag na ulit ang EDSA hanggang sa North Avenue, bago bumagal ulit papunta ng Muñoz.

Watch more News on iWantTFC

 

Bisitahin ang Patrol.PH para sa iba pang mga balita.