Home-based learning mananatili sa new normal: DepEd exec

Arra Perez, ABS-CBN News

Posted at May 17 2021 12:42 PM | Updated as of May 17 2021 01:05 PM

Watch more in iWantTFC

Mag-isang binubuhay ni Annalinda Barso ang kaniyang 3 anak mula sa pagtitinda ng ulam sa tapat ng kanilang bahay.

Isinasabay ni Barso ang paghahanapbuhay sa pagtuturo sa mga anak, na lahat ay nagdi-distance learning.

"Ang hirap din 'pag diyan lang sa bahay din sila... Pagkatapos ng tinda, kahit puyat, tuturuan ko pa rin sila," ani Barso.

Para naman sa guro na si Eden Enoch, na higit 2 dekada na sa serbisyo, ang pagtuturo ng distance learning ay nangangahulugang parati silang nariyan para sa mga estudyante.

"Twenty four-seven talaga 'yong trabaho. Kumbaga, hindi maikakailala na any time, sa lahat ng oras, hindi mo puwedeng hindi pansinin iyong ipapasa ng bata na output," ani Enoch.

Ayon kay Education Undersecretary Diosdado San Antonio, bahagi na ng edukasyon ang home-based learning kahit pa matapos ang pandemya.

"Kahit bumalik pa ang normal na tinatawag, new normal o better normal ang gusto ng iba, naniniwala ako na iyong home-based learning ay option ng bawat mag-aaral," ani San Antonio.

Ayon pa kay San Antonio, sakaling hindi pa rin payagan ang limited face-to-face classes sa susunod na school year, may mas mabisang sistema na ang DepEd para sa distance learning, lalo't marami nang naitamang errors sa learning resources.

"Iyong mga natutunan natin ngayong taon ay gagamitin natin upang maging mas mabisa, mas maging maayos iyong mga sistemang ginagawa," aniya.

Matatapos ang kasalukuyang school year sa Hulyo 10. Kailangan pang aprubahan ni Pangulong Rodrigo Duterte ang petsa ng pagsisimula ng School Year 2021-2022.

Una rito, sinabi sa ABS-CBN News ni San Antonio na ipinanukala ng ahensiyang sa Agosto 23 magsimula ang susunod na school year — bagay na inalmahan ng ilang teachers' group dahil mapapaikli nito ang school break.
 

RELATED VIDEO:

Watch more in iWantTFC
Bisitahin ang Patrol.PH para sa iba pang mga balita.