PatrolPH

Pagnanakaw ng gulong sa parking ng mall, nauwi sa habulan sa Muntinlupa

ABS-CBN News

Posted at May 14 2021 07:12 AM | Updated as of May 14 2021 09:56 PM

Watch more on iWantTFC

MAYNILA—Nagkaputukan sa labas ng isang mall sa Barangay Alabang, Muntinlupa nang habulin ng mga guwardiya ang 3 umano'y magnanakaw na umatake sa parking lot ng mall Huwebes ng hapon.

Sa ulat ng Muntinlupa City Police, nakita na ng mga tauhan ng Starmall Alabang sa pamamagitan ng CCTV ang pagnanakaw ng spare tire ng isang sasakyang nakaparada sa second floor ng parking building nito bandang 4:30 ng hapon.

Sabi ng mga taga-mall sa pulis, isinakay ang ninakaw na gulong sa dalang puting SUV ng mga suspek. 

Inabangan ng mga security guard ng mall ang paglabas ng mga getaway vehicle sa parking exit.

Pero nang patigilin ng mga guwardiya ang sasakyan, binangga nito ang kanilang pinambarikadang motorsiklo at tumakas.

Dito pinaputukan ng mga guwardiya ang gulong ng SUV para mapigilan.

Nakalayo pa rin ang sasakyan pero maya-maya nadiskubreng inabandona sa labas ng isang condominium sa Barangay Sucat. Nasa kustodiya na ito ng pulisya.

Pinaghahanap pa ng pulisya ang mga tumakas na suspek. 

RELATED VIDEO

Watch more on iWantTFC
Bisitahin ang Patrol.PH para sa iba pang mga balita.