PatrolPH

Pamimigay ng cash aid sa Quezon City nauwi sa bulyawan, pag-aresto

ABS-CBN News

Posted at May 10 2020 03:23 PM | Updated as of May 10 2020 06:22 PM

Watch more News on iWantTFC

Tatlo ang naaresto matapos mauwi sa bulyawan ang pamimigay ng ayuda mula sa social amelioration program (SAP) sa Barangay Culiat, Quezon City ngayong Linggo.

Ayon sa barangay chairman na si Vic Bernardo, inakala ng mga residenteng hindi pa nabibigyan ng tulong pinansiyal na ngayong Linggo mamamahagi ng ayuda ang mga opisyal ng barangay.

Pero ayon kay Bernardo, sa Lunes, Mayo 11 pa nakatakdang ibigay ng Quezon City Social Services Development Department ang pondo para sa natitirang SAP beneficiaries sa lugar.

Nang pauwiin ang mga pumilang residente, may ilan umanong naiwan, at pinagmumura at pinagbantaan ang mga tauhan ng barangay.

"Wala naman ako in-announce na ngayon 'yong payment... eh nakapila sila doon. Siyempre natural papaalisin namin," kuwento ni Bernardo.

"Iyong mga 80 percent nakinig, nag-uwian kasi bukas 'yong nakuha kong schedule. Tapos noong may natira, gumawa ng gulo," aniya.

Nasa 700 residente ng barangay na lamang ang hindi nakakuha ng cash aid mula sa SAP.

"Actually tapos na kaming mag-ano ng payment ng SAP, ang natira na lang, mga unclaimed. Halimbawa, iyong mga schedule na hindi nakarating," paliwanag ni Bernardo.

Mahaharap sa kaukulang reklamo ang 2 lalaki at isang babae na nagpasimuno umano ng gulo.

Sa Barangay Bagong Pag-asa naman, nagkabalyahan ang mga residente para makauna sa pila sa bigayan ng SAP cash aid.

Ayon kay Rodolfo Palma, chairman ng barangay, nagpatawag sila ng pulis para isaayos ang pila dahil ayaw makinig ng mga residenteng nag-uunahan.

"Nawawala na sa kanila 'yong social distancing, physical distancing," ani Palma.

"Makakakuha ka nga ng pera diyan, magkasakit ka naman, magkahawa-hawa kayo diyan," dagdag niya. -- Ulat ni Henry Atuelan, ABS-CBN News

Bisitahin ang Patrol.PH para sa iba pang mga balita.