PatrolPH

Ginang, pinatay at itinago umano sa drum ng live-in partner dahil sa 'selos'

ABS-CBN News

Posted at May 09 2023 05:32 PM

Pinatay ang isang ginang at itinago umano sa drum ng kaniyang live-in partner na Amerikano sa Bacoor City, Cavite, sabi ng pulisya ngayong Martes.

Nasa state of decomposition na nang datnan ng mga pulis ang bangkay ng 47-anyos na ginang na nakabalot at nakasilid sa isang drum sa bahay ng 71 anyos na kinakasama nito bandang ala-1 ng hapon.

Mismong ang anak ng biktima ang nagturo sa bahay ng live-in partner na posibleng kinaroroonan nito.

Hindi na umano tumanggi pa ang suspek sa krimen at kaagad na inamin ang ginawang pagpatay.

"Sinakal siya, noong namatay na siya, tinago niya sa drum. Hindi pa po namin alam 'yung motibo, siguro para maitago 'yung crime, 'yun nga na-surprise siya, pinuntahan siya sa bahay tapos noong makaamoy tayo ng foul odor, doon na niya inamin na nandoon 'yung biktima," ani PCol. Christopher Olazo ng Cavite police. 

Hinala ng mga awtoridad, tinatayang nasa 3 hanggang 4 na araw nang patay at nakatago sa drum ang biktima.

Ayon sa pulisya, isa sa tinitingnang anggulo sa pagpatay ay selos.

"Ang ano po namin dito, jealousy po siguro kasi live-in partner niya po itong biktima," sabi ni Olazo.

Nasa kustodiya na ng pulis ang Amerikanong suspek na mahaharap sa kasong murder.

— Ulat ni Gracie Rutao

Bisitahin ang Patrol.PH para sa iba pang mga balita.