PatrolPH

Ilang insidente ng karahasan sa araw ng halalan, naitala sa mga probinsiya

ABS-CBN News

Posted at May 09 2022 08:10 PM | Updated as of May 09 2022 08:18 PM

Watch more News on iWantTFC

May ilang insidente ng election-related violence ang naitala sa mga probinsiya nitong araw ng halalan. 

Tatlong miyembro ng Barangay Peace Action Team sa Buluan, Maguindanao ang napatay habang isa ang sugatan matapos pagbabarilin sa labas ng voting center. 

Nakaupo sa loob ng kanilang sasakyan ang mga biktima nang pagbabarilin ng mga salarin, ayon sa pulisya. 

Anim ang patay sa magkakahiwalay na insidente ng karahasan sa Lanao del Sur, ayon sa mga militar. 

Nabidyohan naman ng isang Bayan Patroller ang kaguluhan sa Malabang National High School kung saan nagtakbuhan ang mga tao nang biglang makarinig nang sunod-sunod na putok ng baril. 

Ayon sa kaniya, bandang alas-11 ng umaga dumating ang mga lalaking nakaputi na lulan ng isang pick-up truck sa voting center. 

Apat naman ang sugatan sa pagsabog sa Datu Piang National High School sa Maguindanao. 

Napigilan naman ang tangkang pang-aagaw ng mga balota sa tatlong insidente sa Tipo-Tipo, Basilan, pero nasira ang mga balota matapos mabuhusan ng indelible ink. 

Samantala, patay sa pamamaril ang isang guro sa Himamaylan National High School sa Negros Occidental. Nakatakda sanang magsilbi ngayong araw ng halalan ang biktima. 

Mariing kinondena ng Department of Education ang insidente, at nanawagang tutukan ito para mabigyang-hustisya ang pagkamatay ng guro. 

Nagpaabot na rin ng tulong ang DepEd sa kaniyang mga naulila. 

-- Ulat nina Lerio Bompat at Jeff Canoy, ABS-CBN News

Bisitahin ang Patrol.PH para sa iba pang mga balita.