‘Night Charity Parade’ isinagawa ng grupo ng fire volunteers sa Quezon City

ABS-CBN News

Posted at May 08 2021 03:47 AM | Updated as of May 08 2021 06:42 AM

MAYNILA - Nag-ikot Biyernes ng gabi ang ilang kabataang miyembro ng fire volunteer group para mag-abot ng tulong sa ilang mga mahihirap na nadatnan nilang nakatira lang sa kalsada sa ilang bahagi ng Quezon City.

“Naisipan namin magsagawa ng ‘Night Charity Ride’ para sa ikakabuti ng mga nangangailangan sa panahon ng pandemya. Marami ang nahihirapan, marami ang hindi nakakakain," ani Sean Laurence Parra na isang estudyante na fire volunteer. 

"Naisipan namin na gabi ito ganapin dahil ito makikita namin sino ang lubos na nangangailangan, sino ang kumuha ng basura, sino ang natutulog sa kalsada."

Nasa 20 fire volunteers ang sumama sa charity ride kung saan nag-ambagan sila para makabili ng kaunting pagkain at iba pang pangangailangan.

Hindi lalagpas sa 100 packs ang naipon nila at ipinamigay ngayong gabi.

“Dahil pandemic ngayon nakita natin na hihirapan ang mga kababayan natin, kaming mga kabataan naisipan namin na instead na sa bahay lang, mag-module. Iyong iba wala naman ginagawa, so tumulong nalang sa bayan,” ani Parra.

Kabilang sa mga inikutan ng grupo ang ilang bahagi ng Novaliches, Quezon City.

Balak nilang ulitin ang charity ride kung saan mas maraming volunteers pa sana ang makasama at makalikom ng mas malaking halaga.

“As fire volunteers, tutulong po kami sa komunidad, kahit wala po kami sweldo sa nakukuha sa ginagawa. masaya na po kami na tumutulong sa komunidad kahit sa murang edad, nakakatulong kami lalo na sa mga walang bahay,” ani Parra.

Ikinatuwa naman ng mga nabigyan ng tulong ang ginawa ng grupo.

“Salamat po. Malaking bagay po na may nagbibigay po sa amin,” ani Trinidad Sagala, isa sa mga nahatiran ng tulong ng grupo.

RELATED VIDEO

Watch more in iWantTFC
Bisitahin ang Patrol.PH para sa iba pang mga balita.