Smuggled na karne at medical supplies mula China nasamsam sa Maynila

ABS-CBN News

Posted at May 07 2021 07:47 PM | Updated as of May 07 2021 09:08 PM

MAYNILA — Nakumpiska ng mga tauhan ng National Bureau of Investigation (NBI) at Manila City Hall ang tinatayang nasa P15 milyong halaga ng mga pinuslit na mga karne at medical supplies galing umanong China.

Pinasok ng mga operatiba ng NBI-National Capital Region at city hall officials ang isang bahay sa Gagalangin, Maynila matapos silang makatanggap ng impormasyon na may ibinabagsak doon na mga smuggled na karne.

Sa loob, naaktuhan pa ang container van at ang mga ibinabang mga karton ng mga trabahador. Pagbukas, tumambad ang mga karneng isda, manok, baboy, talaba, peking duck, siomai at iba pang frozen products. Ang iba, masangsang na ang amoy. 

Nadiskubre rin na lumabag sila sa patakaran sa tamang pag-iimbak ng karne.

"Tingnan mo 'yan, pinagsama-sama nila lahat dito. May contamination 'yan," ani Dr. Nick Santos, hepe ng Veterinary Inspection Board ng Manila City Hall. 

Wala ring maipakitang certification na na-inspect ang mga karne.

Apat na cold storage facility ang natuklasan ng mga awtoridad sa bahay. Lumalabas sa kanilang imbestigasyon na pare-pareho itong hindi nakarehistro sa city hall at sa Department of Agriculture.

Paliwanag din ng Veterinary Inspection Board, kadalasan ay binebenta ang mga produkto sa mas murang presyo na ikalulugi naman ng local hog raisers.

"Usually ito smuggled Chinese products na bawal sa Pilipinas. Pinagsisimulan ng bird flu at Africian swine fever galig sa countries tulad China... Pinagtatakahan nga namin paulit-ulit kami nakakahuli, hindi matapos-tapos," sabi ni Santos. 

Bukod sa mga karne, may nadiskubreng nakapuslit din na mga face mask at personal protective equipment doon. 

Tumanggi naman magbigay ng panayam ang mga trabahador at ang mga namimili ng karne. 

Iniimbestigahan naman ng NBI ang impormasyon na dito kumukuha ng karne ang ilang kainan. 

Lumalabas din na wala silang business permit, at pangalawang beses nang na-raid ang lugar.

Nasa lima ang kakasuhan ng NBI, kasama ang mga may-ari ng pasilidad.
 
Nahaharap sila sa paglabag sa Consumer Act, Meat Inspection Code at Food Security Act. 

Pinaghahanap naman ang consignee ng kargamento.

—Ulat ni Niko Baua, ABS-CBN News

Bisitahin ang Patrol.PH para sa iba pang mga balita.