TINGNAN: Tensiyon sa pagitan ng Marcos, Robredo supporters sa mall sa Makati

Joyce Balancio, ABS-CBN News

Posted at Apr 28 2022 07:21 PM

 Nagkasalubong sa isang mall sa Makati ang mga tagasuporta nina Bongbong Marcos at Leni Robredo, kapwa tumatakbong pangulo sa halalan 2022, nitong Huwebes. Screenshot mula sa video ni Joyce Balancio, ABS-CBN News
Nagkasalubong sa isang mall sa Makati ang mga tagasuporta nina Bongbong Marcos at Leni Robredo, kapwa tumatakbong pangulo sa halalan 2022, nitong Huwebes. Screenshot mula sa video ni Joyce Balancio, ABS-CBN News

Tila may namuong tensiyon sa pagitan ng mga tagasuporta ng presidential candidates na sina Ferdinand "Bongbong" Marcos Jr. at Vice President Leni Robredo sa isang mall sa Makati City, Huwebes. 

Nagpakita ng puwersa ang parehong grupo habang namamasyal sa Rockwell Powerplant Mall, kung saan nagsama-sama ang mga nakapulang Marcos supporters at ang mga nakakulay rosas na tagasuporta ni Robredo.

Nang magsalubong sila sa lower ground floor ng mall, nagpalakasan ng chant ang 2 grupo ng "Leni" at "BBM".

Kapansin-pansin naman na tumaas ang presensiya ng mga security guard sa nasabing mall para iwasang lumala ang tensiyon.

Sabi ng ilang tagasuporta ni Marcos, gusto nilang labanan ang mga komento laban sa supporters ng UniTeam.

"Kasi one time we went to a coffee shop, and they said, 'Ma'am we are so happy that you are here dahil iyong mga BBM daw hindi kaya mag-Starbucks, at hindi nagmo-mall.' Sabi namin, ano?" sabi ni Frannie Romualdez, first cousin ni Marcos.

Kaniya-kaniya namang pakulo ang mga tagasuporta ni Robredo.

May namimigay ng pulang rosas, habang may isang nagdala pa ng malaking pink stuffed bear na tinawag nilang "Leni Bear".

"There's is a call from the other side that they will be here. Knowing that 'Leni Bear' is an everyday thing here in Rockwell, their objective of coming over, the Kakampinks are also present to give support to me and Leni Bear," sabi ng may bitbit nitong si Mike Marcaida. 

Nasa nasabing mall din ang convenor ng opposition coalition 1Sambayan na si Howard Calleja.

"One week na lang, wala nang urungan ito sa laban sa ating kampanya para kay Leni at Kiko. So kung meron man d'yan na nagtatangka o whatever, poprotektahan namin si Leni bear hanggang dulo. Todo na ‘to! Para sa pagprotekta natin kay Leni at Kiko at sa pagprotekta natin sa ating boto come May 9," sabi ni Calleja.

Nasa 11 araw na lang ang natitira bago ang halalan sa Mayo 9.

KAUGNAY NA ULAT:

Watch more News on iWantTFC