PatrolPH

Local absentee voting nagsimula na

ABS-CBN News

Posted at Apr 27 2022 02:40 PM | Updated as of Apr 27 2022 07:24 PM

Watch more News on iWantTFC

(UPDATE) Umarangkada ngayong Miyerkoles ang local absentee voting (LAV), kung saan pinayagan nang makaboto ang ilang naka-duty sa mismong araw ng halalan sa Mayo 9. 

Nasa 84,357 na botante ang pinayagan ng Commission on Elections (Comelec) na bumoto sa LAV.

Galing ang mga local absentee voter sa iba't ibang ahensiya ng gobyerno kabilang ang Philippine Army, Philippine Air Force, Philippine Navy, Philippine Coast Guard, Philippine National Police, Department of Education, Department of the Interior and Local Government at iba pa.

Kasama rin sa mga nakaboto sa tanggapan ng Comelec sa Intramuros, Maynila ang mga miyembro ng media at mga taga-poll body.

"Masaya kasi pagdating sa election day focus na tayo sa trabaho natin dahil 'di na natin iisipin na kailangan pa nating bumoto," sabi ng Rappler reporter na si Dwight de Leon.

"It's better and convenient. Maybe siguro gawing 4 days, I suppose. That will be more convenient... Mas maganda siguro kung at least 4 days instead of 3 days," sabi ni Paolo Romero, mamamahayag mula sa Philippine Star.

Bumoto na rin ang mga pulis sa Maynila, Iloilo at Southern Leyte province, at Davao region.

Katulad ng overseas voting, puwede lang iboto sa LAV ang pangulo, bise presidente, mga senador, at party-list.

Hindi na rin puwedeng bumoto sa Mayo 9 ang mga nakarehistro sa LAV, na tatakbo hanggang Biyernes, Abril 29.

Sa tanggapan ng Comelec, may inilaang isolation polling precinct para sa mga botanteng makikitaan ng sintomas ng COVID-19.

Tiniyak ni Comelec Commissioner George Garcia na protektado ang mga balota at hinikayat ang mga botanteng huwag palampasin ang pagkakataong makaboto.

Samantala, ibinalita naman ni Garcia na tinaasan na ng Comelec ang honoraria ng mga magsisilbing electoral board sa mga presinto sa halalan.

Sinabi naman ni Comelec Chairman Saidamen Pangarungan na 10 lugar sa Pilipinas ang nasa ilalim ng Comelec control.

— May ulat ni RG Cruz, ABS-CBN News

Watch more News on iWantTFC
Bisitahin ang Patrol.PH para sa iba pang mga balita.