'Digital money' ayuda ng Makati City sa 'Makatizens' sa gitna ng COVID-19 crisis

ABS-CBN News

Posted at Apr 27 2020 07:12 PM

Watch more in iWantTFC

MAYNILA — Sinimulan na ng lokal na pamahalaan ng Makati City ang paggamit ng cashless transaction para maiwasan ang aktuwal na paghaharap ng frontlinerss at mga residente sa tuwing maghahatid ng ayuda ang lungsod.

Sa pamamagitan nito, direktang naihahatid ang ayuda sa benepisyaryo at naiiwasan ang mahabang pila ng mga tao.

Ang tricycle driver na si Mark Lagorza, sumugod sa grocery matapos matanggap ang ayuda mula sa LGU.

"Napakalaking tulong po 'yung binigay sa akin ni mayora ngayon," aniya.

"Makatizen card" ang gamit ni Lagorza na pambayad dahil dun pinadala ng city government ang P2,000 ayuda.

Ayon sa Makati Tricycle Federation, ito na ang pangalawang beses na nakatanggap ng tulong ang halos 6,000 mga tricycle driver sa Makati.

Ayon kay Makati City Mayor Abby Binay, electronic money ang pinili nilang paraan para maghatid ng ayuda para maiwasan na magharap-harap pa ang mga tao

Ngayong extended hanggang Mayo 15 ang enhanced community quarantine, sinasapinal na ng lokal na pamahalaan ang kanilang recovery plan para sa lunsod. —Ulat ni Jorge Cariño, ABS-CBN News 

Bisitahin ang Patrol.PH para sa iba pang mga balita.