Lalaking nagpanggap na pulis, arestado

ABS-CBN News

Posted at Apr 26 2018 10:12 AM

MAYNILA - Naaresto sa checkpoint sa NAIA Road, Pasay City ang isang lalaki na nagpanggap umanong pulis.

Ayon kay PO3 Robinson Alsol, pinara ang 35-anyos na suspek dahil walang itong helmet habang sakay ng motorsiklo.

Dito na nagpakilalang pulis ang suspek at nagpakita pa ng ID na napag-alamang peke pala.

"Kasi sa orihinal may middle name 'yun. 'Yung sa kaniya initial lang 'yung letter nila. Buong pangalan 'yun 'pag sa PNP," ani Alsol.

"Tsaka 'yung badge number niya, malayong-malayo sa edad niya tsaka sa serbisyo niya."

Nakuha rin sa suspek ang isang 5 pulgadang kitchen knife.

Nanindigan naman ang suspek na siya ay isang pulis na may ranggong police officer 1.

Nakasuot siya ng police uniform at may badge, patch, at bullcap pa.

Napag-alaman naman ng mga pulis na isa palang tricycle driver ang suspek.

Mahaharap ito sa patong-patong na kaso kabilang ang usurpation of authority at paglabag sa Omnibus Election Code. - ulat ni Arra Perez, ABS-CBN News

Bisitahin ang Patrol.PH para sa iba pang mga balita.