Red tagging sa community pantries 'galing sa itaas,' ayon sa dating kongresista

ABS-CBN News

Posted at Apr 21 2021 05:54 PM | Updated as of Apr 21 2021 08:57 PM

Mark Demayo, ABS-CBN News

MAYNILA — Kumbinsido ang dating congressman at Bayan Muna chairman Neri Colmenares na may "kumpas sa taas" ang naiulat na pangha-harass ng mga pulis sa ilang community pantry organizers.

Nakatanggap aniya sila ng report na bukod sa Maginhawa, pinuntahan din ng mga pulis ang ibang community pantry gaya sa Matatag, Loyola, at maging hanggang sa Bicol.

"Hindi pwedeng may pulis lang na nag-isip na 'pumunta nga ako sa Maginhawa,' imposible yun. Galing yun sa taas. National yun. Ito naman ang problema sa kapulisan natin, ayaw magsabi ng impormasyon na kailangan, sino ba talaga ang nag-utos nyan?" ani Colmenares.

Watch more in iWantTFC

Kaya naman nag-ikot ngayong araw si Colmenares at ilang volunteer lawyers sa iba't ibang community pantry sa Metro Manila para ipakita ang suporta at pakikiisa sa kanilang inisyatibo.

Sabi ni Colmenares, gusto nilang ipanatag ang loob ng mga organizer na wala silang nilalabag na batas.

Giit naman ng Palasyo nitong Martes, maganda ang hangarin ng mga community pantry at ito hindi nila tututulan. Dumistanya rin ang Malacanang sa red-tagging at sinabing ang National Task Force to End Local Communist Armed Conflict (NTF-ELCAC) ang nararapat sumagot sa mga akusasyon. 

Nauna nang humingi ng tawad ang Quezon City Police District matapos i-red taga ng grupo ni Ana Patricia Non, ang nagpasimuno ng Maginhawa community pantry na ginaya na sa iba't ibang bahagi ng bansa.

Ang National Task Force to End Local Communist Armed Conflict (NTF-ELCAC), na inakusahan din ng red tagging, nanindigang "checking" lang ang ginagawa nila.

Watch more in iWantTFC

Wala naman aniyang dapat ikatakot ang mga nais magtayo ng community pantry, ayon kay NTF-ELCAC spokesman Lt. Gen. Antonio Perlade.

"They're informing us na 'merong ganitong activity sa aming community, paki-chek po kasi bakit sila meron silang karatula na kung ano-ano.' Merong agitation mga propaganda materials... Iba na ho kung merong pabagsakin ang gobyerno," ani Parlade. 

Paliwanag naman ng sociologist na si Dakila Kim Yee ng Tacloban City College, nagkakaroon ng community demand kung may kakulangan ang gobyerno lalo na sa panahong may pandemya at gutom ang epekto ng mga pagkukulang sa serbisyo ng pamahalaan.

"Yung mga ganitong initiatives uusbong siya, magsusulputan siya kung merong perceived na gaps sa service delivery po. Kumbaga usually sa merkado kung wala namang pambili yung tao, yung produkto o serbisyo pwedeng punan ng mga community based na mga networks," paliwanag ni Yee.

Balik-operasyon naman ang Maginhawa community pantry nitong Miyerkoles matapos pansamantalang magsara dahil sa red tagging.

—May ulat ni Mike Navallo, ABS-CBN News

Bisitahin ang Patrol.PH para sa iba pang mga balita.