Community pantry itinayo sa Intramuros

Jerome Lantin, ABS-CBN News

Posted at Apr 21 2021 02:41 PM | Updated as of Apr 21 2021 09:52 PM

Namimigay ng pagkain ang mga tauhan ng community pantry na itinayo sa Intramuros, Maynila. Jerome Lantin, ABS-CBN News

MAYNILA (UPDATE) — Nagbukas ang isang community pantry sa Intramuros, Maynila, na hango sa inisyatibang sinimulan sa Quezon City na may layong makatulong sa mga nangangailangan ngayong panahon ng pandemya.

Noong Sabado binuksan ng Intramuros Administration ang community pantry, kung saan maaaring mag-iwan ng pagkain at iba pang pangunahing pangangailangan ang mga tao para ibigay sa iba.

Una umanong nag-donate ng pagkain ang mga government office sa loob ng Intramuros tulad ng Department of Labor and Employment at Commission on Elections.

Nagbigay rin ng pagkain at mga rosaryo ang Manila Cathedral at San Agustin Church.

Tuloy-tuloy rin ang pagdating ng tulong mula sa private donors.

Sa pagtataya ni Yohan Joseph Ararao, executive assistant to the administrator of Intramuros, umabot na sa 6,000 hanggang 7,000 tao ang kanilang natulungan sa pamamagitan ng community pantry.

Isa rito ang 26 anyos na si Jhe Anne Palmes, na dating empleyado ng isang photo studio pero nawalan ng trabaho mula nang tumama ang COVID-19 pandemic.

Naglakad si Palmes mula Baseco para makakuha ng gulay, na malaking tulong daw para maitawid ang pangangailangan nila ng kaniyang pamilya.

"Isa po ako sa nawalan ng trabaho, so malaking tulong na rin po ito sa amin. Pantawid-gutom po," ani Palmes.

Nakaatado ang mga pagkain sa Intramuros pantry para pantay-pantay lang ang pagkuha ng mga nangangailangan.

 DOT, SUPORTADO ANG INISYATIBO

Ikinatuwa naman ng Department of Tourism ang community pantry, at sinabing suportado nila ito. 

Ayon kay Tourism Secretary Bernadette Romulo-Puyat, kailangan lang daw na makipag-coordinate sa mga opisina sa Intramuros para matulungan silang ma-set up ito at para masiguro na masusunod ang health protocols laban sa COVID-19. 

“Walang masama kasi that’s typical Filipino. Nagtutulungan tayo. Bayanihan," ani Puyat. 

Mayroon din daw namataan na community pantry ang ahensya sa Plaza Roma. Gawa raw ito ng ilang empleyado sa Intramuros. 

 “I was very happy that the employees set up a community pantry in Plaza Roma. Ang ginawa lang nila, naglagay pa sila ng alcohol dispense. I heard they want to set up more kasi open space," aniya. 

Ang community pantries ay isang inisyatibo na namimigay ng libreng gulay, pagkain, at suplay sa mga taong nangangailangan nito. Bukas din ito sa mga donasyon. 

Simula ng pag-usbong nito noong isang linggo, daan-daan na ang community pantries na nagsulputan sa iba't ibang bahagi ng bansa. 

- May ulat ni Jeff Canoy, ABS-CBN News

 RELATED VIDEO:

Watch more in iWantTFC
Bisitahin ang Patrol.PH para sa iba pang mga balita.