PatrolPH

Ilang naliligo sa pool sa Davao del Sur, sugatan nang mabagsakan ng naputol na puno

ABS-CBN News

Posted at Apr 18 2021 07:20 PM | Updated as of Apr 22 2021 03:46 PM

(UPDATE) Sugatan ang ilang naliligo sa swimming pool sa magkahiwalay na resort sa Davao del Sur ngayong Linggo matapos mabagsakan ng naputol na puno.

Sa bidyo na kuha ni Rheynald Nulla, makikitang sinasagip pa ang ilang biktima mula sa pool na puno na ng dahon at sanga ng puno sa isang resort sa bayan ng Bansalan.

Ani Nulla, malakas ang hangin na posibleng epekto ng bagyong Bising.

Dagdag pa niya, may ilang nagtamo ng serious injuries at may nabalian pa ng paa. Kasalukuyang ginagamot sa ospital ang mga biktima.

Sa karatig bayan ng Hagonoy, mayroon ring 3 indibidwal na nasugatan matapos mabagsakan ng puno ng niyog.

Watch more News on iWantTFC

Sa bayan ng Matanao sa parehong lalawigan, anim na tao ang nagtamo ng mga galos at sugat matapos mabagsakan rin ng naputol na puno habang nasa swimming pool sa isang resort sa Barangay Sinawilan.

Sa imbestigasyon ng pulisya, bilang naputol ang bahagi ng puno dahil sa malakas na hangin at tumama sa mga nasa swimming pool. 

Agad silang isinugod sa ospital. Nangako rin ang may-ari ng resort na tutulong sa pagpapagamot sa mga biktima.

Ilang naliligo sa pool sa Davao del Sur, sugatan nang mabagsakan ng naputol na puno 1
Photo courtesy of Matanao PNP

Samantala, nasa halos 200 pamilya mula sa bayan ng Palapag sa Northern Samar ang lumikas dahil sa bagyong Bising.

Sa tala ng Municipal Disaster Risk Reduction and Management Office ng Palapag, nasa 85 pamilya o 255 indibidwal mula sa Barangay Binay ang lumikas, ganun din ang 102 pamilya (331 inbidwal) mula Barangay Mapno, at 8 pamilya (32 indibidwal) mula Barangay Sumuroy.

Ilang naliligo sa pool sa Davao del Sur, sugatan nang mabagsakan ng naputol na puno 2
Photo courtesy of MDRRMO Palapag

Mananatili ang mga residente doon sa evacuation centers hanggang hindi pa inaalis ng mga awtoridad ang banta sa pananalasa ng bagyo.

Kasama din sa inilikas ang isang ginang at isang sanggol na nangangailangan ng blood transfusion. Sila ay dinala sa isang hospital sa Northern Samar.

-- ulat nina Hernel Tocmo, Francis Magbanua at Ranulfo Docdocan

Bisitahin ang Patrol.PH para sa iba pang mga balita.