PatrolPH

Easter Vigil sa Manila Cathedral, pinangunahan ni Manila Archbishop Advincula

Jose Carretero and Nico Bagsic, ABS-CBN News

Posted at Apr 17 2022 12:23 AM | Updated as of Apr 17 2022 09:15 AM

Easter Vigil ABS-CBN News.
Pinangunahan ni Manila Archbishop Jose Cardinal Advincula ang tradisyunal na Easter Vigil sa Manila Cathedral, April 16, 2022. Jose Caretero, ABS-CBN News.

MANILA - Pinangunahan ni Manila Archbishop Jose Cardinal Advincula ang tradisyunal na Easter Vigil sa Manila Cathedral nitong Linggo. 

Alas otso ng gabi nagsimula ang seremonya sa pamamagitan ng Blessing of the Fire at ang pagsindi ng Paschal Candle.

Ang pagsindi ng Paschal Candle ay sumisimbolo ng muling pagkabuhay ni Kristo.

Sa seremonya, sinabay na rin ang binyag sa magkapatid na Philsaint at Clairevy Bantang. Nagpa-convert ang mga ito sa katoliko kaya ngayon lang nagpabinyag.

Kapwa masaya ang magkapatid na sa araw mismo ng pagkabuhay ni Jesus sila nabinyagan bilang ganap na katoliko. Ayon sa simbahan, kasama sa tradisyon ng Easter Vigil ang pagbibinyag. 

Tumagal nang magta-tatlong oras ang selebrasyon.

Isinagawa rin ang Easter Vigil sa Minor Basilica of the Black Nazarene, o mas kilala bilang Quiapo Church.

Nagsimula ito alas-7 ng gabi, sa pamamagitan ng Blessing of Fire, na sinundan ng procession ng inilawang Paschal candle.

Bagaman mas kaunti ang dumalo kumpara sa ibang mga aktibidad sa mga nagdaang araw, kapansin-pansin na rin ang dami ng mga tao lalo't ito ang unang Easter Vigil Mass kung saan pinahintulutan muli ang aktwal na pagdalo ng mga mananampalataya simula nang magka-COVID-19 pandemic noong 2020. 

Tinanggal na ang mga harang na nakapalibot sa Plaza Miranda, kaya't pumuwesto sa harap ng simbahan ang mga hindi nakapasok sa loob. Kahit nasa COVID-19 Alert Level 1 na ang Metro Manila, nililimitahan pa rin ng simbahan ang dami ng taong maaaring pumasok.

Binigyang diin ni Msgr. Hernando Coronel, Rector Parish Priest ng Minor Basilica of the Black Nazarene, ang ligaya, pag-asa at pagdiriwang na aniya'y siyang sinisimbolo ng pagkabuhay muli ni Hesu Kristo.

“Tayo po, pinagdaraaanan natin mga pagsubok, mga hirap, problema, suliranin, lumbay, pighati, panaghoy, iyak, luha, tangis, lamentasyon, hambal, panglaw… malalalim na katagang Pilipino… Ito ang marka, ito po ang katangian ng ating komunidad. Kaya kumakapit tayo sa Kanya. Alam natin ang pinagdaraanan, tayo, katabi natin, lahat tayo. Tanging petisyon natin sa pag-asa,” sabi niya.

Matapos ang homily ni Coronel ay isinagawa ang pagbibinyag sa mga catechumen.

Lumabas rin ng simbahan ang mga mananampalataya para panoorin ang re-enactment ng pagsalubong ng Nabuhay Muling si Hesu Kristo at Virgen de Alegria. Ito ang hudyat ng pagtatapos ng Black Saturday festivities ng Quiapo Church.
 

MULA SA ARCHIVE

Watch more News on iWantTFC
Bisitahin ang Patrol.PH para sa iba pang mga balita.