PatrolPH

Huwebes Santo: Mga mananampalataya dumagsa sa mga simbahan

ABS-CBN News

Posted at Apr 14 2022 01:49 PM | Updated as of Apr 14 2022 05:46 PM

Mga mananampalatayang bumisita sa Minor Basilica of the Black Nazarene sa Quiapo, Maynila ngayong Abril 14, 2022, Huwebes Santo. Mike Navallo, ABS-CBN News
Mga mananampalatayang bumisita sa Minor Basilica of the Black Nazarene sa Quiapo, Maynila ngayong Abril 14, 2022, Huwebes Santo. Mike Navallo, ABS-CBN News

(UPDATE) Dinagsa ng mga Katoliko ang mga simbahan ngayong Huwebes Santo sa harap ng mas maluwag na restrictions bunsod ng mababang bilang ng mga kaso ng COVID-19 sa bansa.

Pero sa kabila ng pagluluwag, tuloy pa rin sa pagpapatupad ng health protocols sa mga simbahan upang maiwasan ang pagkalat ng sakit.

Sa Minor Basilica of the Black Nazarene o mas kilala bilang Quiapo Church, halimbawa, iisa lang ang pasukan sa simbahan kung saan kinukuha ang temperatura ng mga mananampalataya at nilalagyan ng alcohol ang kanilang mga kamay.

Mayroon ding mga volunteer para tiyaking nasusunod ang physical distancing sa simbahan.

May pila ng mga tao para sa kumpisal habang ang iba'y nagsasagawa ng Stations of the Cross, na ilan sa mga tradisyon sa paggunita ng Semana Santa sa Pilipinas.

Sa labas ng Quiapo Church, nagsasagawa naman ng COVID-19 vaccination ang Department of Health at Manila Health Office mula alas-8 ng umaga hanggang alas-5 ng hapon.

Hindi naman mabigat ang daloy ng trapiko sa Quezon Boulevard sa may Quiapo Church.

Libo-libong mananampalataya naman ang bumisita sa National Shrine of Our Mother of Perpetual Help sa Baclaran, Parañaque ngayong Huwebes Santo.

Ayon sa mga nakapanayam, masaya silang muling nakapag-Visita Iglesia at Stations of the Cross, na hindi nagawa noong nakaraang 2 taon dahil sa banta ng COVID-19.

"Kitang-kita mo pa rin sa mga tao ‘yung parang kasabikan at pagnanais na maipagdiwang ang Semana Santa nang makahulugan," sabi ni Fr. Victorino Cueto, rector ng Baclaran Church.

Maraming Katoliko rin ang bumisita sa St. Joseph Parish Church sa Las Piñas City at Nuestra Señora de Gracia Church sa Makati City, at sa ilang simbahan sa Quezon City.

Samantala, dagsa rin ang mga deboto ngayong Huwebes ang Minor Basilica of Our Lady of Manaoag sa Pangasinan.

— May ulat nina Mike Navallo, Vivienne Gulla at Raphael Bosano, ABS-CBN News at Terry Aquino

Bisitahin ang Patrol.PH para sa iba pang mga balita.