Aquino sinisi sa Dengvaxia issue ng Gordon panel draft report

ABS-CBN News

Posted at Apr 11 2018 07:25 PM

May pananagutang kriminal sina dating Pangulong Benigno Aquino III at iba pang mga dating kalihim at opisyal ng nakaraang administrasyon sa kontrobersiyal na Dengvaxia vaccination program.

Ito ang nilalaman ng draft committee report ng Senate blue ribbon na pinamumunuan ni Sen. Richard Gordon.

Kabilang sa mga matataas na opisyal na may pananagutan umano ay sina dating Health Secretary Janette Garin at dating Budget Secretary Florencio Abad.

Tinawag sa report na "primary conspirators" sina Aquino, Abad, at Garin dahil sila umano ang nasa likod ng pag-apruba sa pagbili ng Dengvaxia.

Pinaboran din umano ni Aquino ang Sanofi Pasteur para sa anti-dengue vaccine at inilagay sa panganib ang kalusugan ng mga batang Pinoy na tinurukan ng bakuna. 

Sinita rin ang pakikipagpulong ni Aquino sa mga Sanofi officials sa Beijing, China, at Paris, France bago naipako ang kontrata. 

"By meeting with [senior officials] of Sanofi Pasteur, he was sending a very strong message or perception that he was dispensing undue patronage." 

Ayon pa sa report, halata rin umanong "minadali" ang proseso sa pagbili sa Dengvaxia.

Pinagbintangan din si Aquino na "walang pakialam" sa pinagdadaanan ng mga magulang.

"Nilagay niya sa peligro ang maraming bata. He simply did not care. Siya ay manhid at walang malasakit. Napakaraming magulang ang nag-aalala, balisa, at hindi makatulog," ani Gordon. 
    
Dahil dito, inirerekomenda ng komite ang pagsasampa ng kaukulang kaso laban kay Aquino at mga kasama sa kontrobersiya.

"Aquino, Garin, Abad and other officials are primary conspirators and must be held criminally liable...[They] must be prosecuted for all the tragedy and possible deaths resulting from Dengvaxia mass vaccination program," ayon sa report.

Inilabas ni Gordon ang report kahit hindi pa ito napipirmahan ng mga kapwa senador na miyembro ng komite.

Matatandaang humarap si Aquino sa mga pagdinig ng Senado sa Dengvaxia kung saan iginiit niyang walang iregularidad sa anti-dengue vaccination program. 

'One-sided'

Samantala, pumalag naman sa rekomendasyon ang mga kaalyado ni Aquino sa Partido Liberal.

Kinuwestiyon ni dating congressman Lorenzo "Erin" Tañada III ang paglalabas ng draft report kahit pa hindi ito napipirmahan ng mga miyembro ng Senate blue ribbon. 

"Why was the committee report released to the public before it has been filed or sponsored? Are not the signatures of majority of the committee members required before the report can be filed?" obserbasyon ni Tañada.

Ayon naman kay Ifugao Rep. Teddy Baguilat, tila hindi na naungkat ang mga pananagutan ng kasalukuyang administrasyon, na siya ring nagpatuloy ng programa. 

“Hindi lang sa nakaraang administrasyon ipinatupad ang bakuna sa Dengvaxia kundi sa kasalukuyang administrasyon. Nakakapagtaka na nakatuon lang ang report ni Sen. Gordon sa nakalipas na administrasyon,” aniya. 

Sa isang statement, tinawag ni Garin na puno ng "half truths" ang report at tanging pananaw lamang ni Gordon ang nilalaman nito. 

"I believe that the narrative is full of inaccuracies and half truths which reflects only the long perceived pre-judgment of the issue by Senator Gordon. The presentation is one-sided...[and] is just the personal opinion of Senator Gordon which has not been vetted by the Senate," ani Garin.

Bisitahin ang Patrol.PH para sa iba pang mga balita.