PatrolPH

Non-essential stalls ipinasara sa Muntinlupa

Anjo Bagaoisan, ABS-CBN News

Posted at Apr 08 2021 06:51 AM

Watch more on iWantTFC

MAYNILA—Pinahinto ang operasyon ng mga tindahan sa bangketa sa Alabang, Muntinlupa na nanatiling bukas sa gitna ng enhanced community quarantine (ECQ) sa kabila ng pagiging “non-essential business”.

Pinuntahan ang lugar ng mga tauhan ng Muntinlupa business permits and licensing office at mga taga-barangay noong Miyerkoles dahil sa mga ulat na nakabukas na mga tindahan kahit noong simula pa lang ng ECQ sa Metro Manila noong Marso 29.

Ipinasara ang mga stall na karamihan ay nagtitinda ng mga accessories, gadgets, at damit. Sinita rin ang mga kainan na nagpa-dine in ng mga customer.

Agad namang sumunod sa pagpapasara ang mga bantay ng tindahan.

Giit ng mga pinagsara, kinailangan nilang magpatuloy ng negosyo dahil doon sila umaasa ng kita para makakain ang mga pamilya lalo ngayong pinalawig ang lockdown.

Pero giit ng pamahalaang barangay at ng lungsod, tanging mga tindahan ng essential goods tulad ng gamot at pagkain ang maaaring magbukas sa ilalim ng ECQ.

Sisimulan pa lang ngayong Huwebes ng Muntinlupa ang pamamahagi nito ng emergency subsidy o ayuda para sa mga apektadong pamilya ng ECQ

Bisitahin ang Patrol.PH para sa iba pang mga balita.