Sampaguita vendors sa labas ng Baclaran Church, tuloy sa pagkayod kahit ECQ

Anjo Bagaoisan, ABS-CBN News

Posted at Apr 07 2021 10:34 AM

MAYNILA - Kahit na sarado sa publiko ngayong enhanced community quarantine ang Baclaran Church sa Parañaque, patuloy na nagsusumikap pa rin na kumita ang ilang mga taong nakadikit ang kabuhayan sa simbahan.

Naglako ng sampaguita ang nasa 10 tindera ngayong Baclaran Day sa mga debotong sumaglit sa harap ng simbahan para manalangin.

Sa kabila pa ito na hindi sila kabilang sa mga authorized persons outside of residence na pinapayagang lumabas ngayong ECQ.

Isa sa kanila ang 73-anyos na si Fe Luna, na mahigit dekada nang nagtitinda ng sampaguita sa Baclaran.

Kuwento niya, dito niya napagtapos sa pag-aaral ang mga anak.

Kung tutuusin, bawal siyang lumabas sa ilalim ng guidelines ng Inter-Agency Task Force dahil sa kanyang edad, pero sabi niya wala rin siyang ibang mapagkunan ng ipangkakain ng pamilya.

"Okay naman, Kahit papano, nakakaraos. Makatinda kami ng 100 may pambigas na kami isang kilo, pambili ng kaunting ulam. Wala e, bawal kami rito sa labas e," sabi ni Luna.

Mas kaunti ang bilang ng mga bumisita sa Baclaran ngayon kumpara sa nakaraang 2 Miyerkules na pinatigil ang pisikal na pagdalo sa Misa.

Aminado ang ibang nagtitinda gaya ni Elvira Alcantara na bumaba ang kita nila dahil dito.

Kung dati aabot sa P400 ang kita nila, ngayon mas mababa ito o kaya wala at may natitira pa sa paninda nila.

"Matumal talaga. Talagang bihira-bihira ang nabili. Sana itong simbahan, sana hindi na lang sinarado. Tingnan mo kahit ECQ maraming nagsisimba kahit sa harapan ng simbahan. Kaya sana kahit simbahan man lang bukas, para kahit papano kumita naman kahit konti," sabi naman ni Alcantara.

Pinaalis naman ng mga nakabantay na pulis ang mga nagtitinda at pinaalalahanan na hindi sila pwedeng lumabas ngayong naka-lockdown.

Nagpaalala rin ang pulisya sa mga dumadaang deboto na tanging mga naglalakad at nakabisikleta ang pwedeng lumapit sa gate.

Sa kabilang bahagi ng kalsada dapat pumarada ang mga nakamotorsiklo.

Pero makalipas ang ilang minuto bumalik din ang mga nagtitinda para magbakasakali ng benta.

Problema nga lang nila ay baka hindi rin maubos ang paninda nila.