PatrolPH

TUCP muling inihain ang petisyon para sa P470 dagdag-sahod

ABS-CBN News

Posted at Apr 05 2022 12:49 PM | Updated as of Apr 05 2022 07:45 PM

Watch more News on iWantTFC

MAYNILA (UPDATE) — Muling inihain ng labor group na Trade Union Congress of the Philippines (TUCP) ngayong Martes ang petisyon para sa P470 na umento sa mga manggagawa sa Metro Manila.

Ito'y matapos ibasura noong Lunes ng Regional Tripartite Wages and Productivity Board ng National Capital Region ang naunang petisyon ng grupo dahil wala umano silang kapangyarihang magbigay ng "across the board" — o para sa lahat ng manggagawa — na umento.

Sa bagong petisyon, tinanggal na ng TUCP ang terminong "across the board" para bigyan ulit ng pagkakataon ang proseso.

Naniniwala umano ang grupo na hindi nagawa ng wage boards ang mandatong gawing nakabubuhay ang sahod sa bansa at isinusulong pa rin ang pag-amyenda o pagbuwag sa sistema.

Hindi na umano bago ang mga "across the board" petition, na bagaman hindi napagbibigyan ay nadedesisyunan pa rin ng mga wage board.

Ang malinaw ngayon anila'y mataas ang presyo ng bilihin at below poverty level ang minimum wage.

"Niloko tayo, nilaro tayo. Sabi nila inaaral nila at mamadaliin, 'yon pala ibabasura. So napapanahon na ang abolition ng wage boards natin," ani TUCP Vice President Louie Corral.

Hiniling ng TUCP ang umento kasunod ng pagtaas ng presyo ng petrolyo at ilan pang bilihin kamakailan.

May 3 pang wage hike petition sa Metro Manila pero balak itong pagsama-samahin at talakayin sa isang public consultation sa Abril 8.

Naghain na rin ng wage hike petition ang TUCP sa iba pang rehiyon sa bansa.

— Ulat ni Zen Hernandez, ABS-CBN News

Watch more News on iWantTFC
Bisitahin ang Patrol.PH para sa iba pang mga balita.