PatrolPH

Huwebes Santo: Mga mananampalataya bumisita pa rin sa mga simbahan kahit sarado

Sherrie Ann Torres, RG Cruz at Niko Baua, ABS-CBN News

Posted at Apr 01 2021 02:31 PM | Updated as of Apr 01 2021 04:42 PM

Huwebes Santo: Mga mananampalataya bumisita pa rin sa mga simbahan kahit sarado 1
Labas ng Saint Paul the Apostle Parish sa Quezon City nitong Abril 1, 2021 o Huwebes Santo. Sherrie Ann Torres, ABS-CBN News

MAYNILA (UPDATED) – Maraming mananampalataya pa rin ang bumisita sa mga simbahan sa Kamaynilaan nitong Huwebes Santo kahit sarado ang mga lugar ng pagsamba dahil sa patuloy na banta ng COVID-19.

Sa Quezon City, sarado ang Saint Paul the Apostle Parish pero may mga tao pa ring pumupunta para mag-alay ng ilang minutong dasal.

Pinapayagan naman sa Diocesan Shrine of Jesus the Divine Word na pumasok ang mga mananampalataya para magdasal basta hindi sila marami.

Kabaligtaran naman ito ng sitwasyon sa Basilica of the National Shrine of Our Lady of Mount Carmel, na sarado sa publiko.

Ayon sa isang empleyado, hindi muna nagsasagawa ng religious activity ang Mount Carmel bilang pakikiisa sa panawagan ng gobyernong manatili ang mga tao sa kanilang mga bahay.

Sa kabila nito, may ilang motoristang humihinto para magdasal sa labas ng simbahan.

May mga mananampalataya rin sa St. Peter Parish: Shrine of Leaders sa Commonwealth Avenue, kung saan puwedeng magsindi ng kandila at magdasal.

May mga vendor din sa paligid ng St. Peter Parish na nagbabakasakaling kumita ngayong Huwebes Santo.

Sa Maynila, sarado ang Minor Basilica of the Black Nazarene o Quiapo Church maging ang Plaza Miranda sa harap nito.

Nagkasundo rin muna ang mga lokal na opisyal at pamunuan ng Quiapo Church na huwag magpalabas ng misa sa malaking screen sa harap ng simbahan para maiwasang magkaroon ng pagtitipon ang mga tao.

Sarado rin ang Manila Cathedral sa loob ng Intramuros.

Sarado rin ang ilang simbahan sa Pasig, Mandaluyong, at San Juan pero may ilang dumadaan sa labas ng mga gusali para doon magdasal.

Karamihan sa mga simbahan sa Metro Manila at mga karatig-lalawigan ay magdaraos ng kanilang Holy Week activities online matapos ipagbawal ng gobyerno ang religious activities dahil sa pagtaas ng bilang ng mga bagong kaso ng COVID-19.

RELATED VIDEO:

Watch more on iWantTFC
Bisitahin ang Patrol.PH para sa iba pang mga balita.