PatrolPH

10% capacity ng pagsipot sa misa, istriktong pinatutupad sa Quiapo Church

Anjo Bagaoisan, ABS-CBN News

Posted at Mar 26 2021 07:32 AM

MAYNILA - Pinaalis ng mga pulis ang mga nagbabalak magsimba sa Quiapo Church na hindi umabot sa cutoff na 100 katao para sa unang misa Biyernes ng madaling-araw.

Ito lang kasi ang pinapayagang capacity ng mga simbahan sa Archdiocese of Manila para sa pisikal na misa ngayong may mas mahigpit na quarantine guidelines sa Metro Manila.

Hindi tulad ng mga nakaraang araw na pinayagan ang ilang hindi umabot na makinig sa misa kahit sa gilid ng simbahan, mahigpit na pinatupad ng mga pulis ang pagbabawal sa mga tao maging sa labas.

Ilang minuto bago magsimula ang misa, itinaboy na ang mga hindi nakapasok. 

Sinubukan ng iba na manalangin sa bahagi ng Plaza Miranda, pero pati iyon binarikadahan na. Kaya ang iba hanggang tanaw na lang ang pagdadasal sa labas ng simbahan.

Umapela ang ilan na matagal nang debosyon ang pagdayo sa Quiapo tuwing Biyernes. Ang iba naman, nakuntento na lang sa pagsindi ng kandila o kaya maghihintay na makapasok sa susunod na misa.

Kadalasan tuwing Quiapo Day dinig mo na rito sa kalsada ang misa sa loudspeaker ng simbahan, pero maging iyon at ang LED na nasa labas ay pinatay para hindi maengganyo ang mga tao na maglagi sa labas.

Bantay sarado ng mga pulis ang Quezon Boulevard habang nasa bakuran ng simbahan ang mga volunteer. 

Nauna nang sinabi ng CBCP na hindi nila itataboy ang mga nais pumasok sa simbahan lalo na ngayong Semaana Santa. 

Bisitahin ang Patrol.PH para sa iba pang mga balita.