Press ID mula sa Malacanang, mali-mali ang grammar

ABS-CBN News

Posted at Mar 23 2018 09:36 PM | Updated as of Feb 07 2020 01:56 PM

Watch more in iWant or TFC.tv

Pinaiimbestigahan ni Presidential Communications Operations Office (PCOO) Secretary Martin Andanar kung papaano naipamahagi sa Malacañang Press Corps (MPC) ang bagong ID na punung-puno ng grammar error. 

Pinagpiyestahan ito ng mga netizen, habang ang iba ay nagkusang i-edit ang mga nakasulat dito.

Ilan sa mga maling grammar na nakalagay dito ay:

“This card to be worn during presidential coverage, but subject to specific accreditation/security requirements. It should be worn all times in entering Malacañang and while inside the Palace grounds."
    
Binatikos din si Andanar, na siyang may pirma sa ID.

Pero giit ni Andanar, nagkaroon ng "breach of protocol" dahil hindi umano ipinakita sa kaniya ang pinal na disenyo ng ID bago ibinigay sa mga Malacañang reporter. 

Sabi pa niya, ginamit nang walang paalam ang kaniyang e-signature.

Pinabawi na ni Andanar ang lahat ng mga ID at ipinagutos na rin ang imbestigasyon dito.

Palpak na transcript

Pero hindi lamang ang ID ang naging palpak ng PCOO sa loob ng isang linggo.
    
Noong Lunes, nagdulot ng kalituhan sa media ang ipinadalang transcript ng mga transcriber ng Palasyo sa umano'y radio interview ni Pangulong Rodrigo Duterte sa radio station na DZRH kasama si Special Assistant to the President Bong Go.

Ang problema nga lang, hindi ang Pangulo ang kanilang kausap kung hindi impersonator lamang niya na si DZRH correspondent Jun Alegre.

Humingi naman ng paumanhin ang mga Palace transcriber pero huli na ang lahat dahil nagamit na ito ng ilang media outlet. 

Nagpaliwanag naman si Andanar at sinabing hindi sinadya ang pagkakamali. 

"I don't think the [writer] transcribed and wrote it with a malicious intent. I also think it was really an honest mistake," depensa ni Andanar.

--Ulat ni Pia Gutierrez, ABS-CBN News

Bisitahin ang Patrol.PH para sa iba pang mga balita.