PatrolPH

PDP-Laban Cusi wing, inendorso si Bongbong Marcos sa pagkapangulo

ABS-CBN News

Posted at Mar 22 2022 02:42 PM | Updated as of Mar 22 2022 06:30 PM

Watch more News on iWantTFC

MAYNILA - Pormal na inendorso ngayong Martes ng PDP-Laban faction na suportado ni Pangulong Rodrigo Duterte ang pagtakbo ni Ferdinand "Bongbong" Marcos Jr. sa pagkapangulo ngayong Mayo.

Agad itong inalmahan ng isa pang paksIyon ng PDP-Laban, isang partidong binuo para labanan ang diktatorya noon sa ilalim ng ama ni Bongbong na si dating Pangulong Ferdinand Marcos Sr.

Sa isang resolution na pinirmahan ni party/faction president Alfonso Cusi at ng ilang opisyal gaya ni Sen. Bong Go, si Marcos Jr. umano ang kandidatong pinaka-aligned sa 11-point agenda ni Duterte. 

May paliwanag din tungkol dito si PDP-Laban Secretary-General Melvin Matibag. 

“Bukod doon sa pag-continue, if you observe the behavior of former senator BBM, we know that everybody was criticized by the president, even BBM. But it’s only BBM na wala siyang sinabi, walang masamang sinabi kay Pangulong Duterte. In fact, sa kabila ng mag sinabi sa kanya, he’s still willing to say na itutuloy niya ang sinimulan ng pangulo. That shows the character of the candidate," ani Matibag. 

Gayunman, sinabi ni Cusi na hindi maituturing na "support" mula mismo kay Duterte ang pag-endorso ng paksiyon kay Marcos Jr. 

"Ito po ay hindi desisyon ng isang tao, ito po ay desisyon ng partido," ani Cusi. 

Una nang in-adopt ng paksiyon ang running-mate ni Marcos Jr. na si Sara Duterte-Carpio, na anak ni Pangulong Duterte. 

Pinuna ni Sen. Koko Pimentel, na namumuno sa kabilang paksiyon ng PDP-Laban, ang desisyon ng Cusi wing.

“With this latest action from Sec. Cusi and his cohorts, they have manifested that they are total strangers to PDP-LABAN. They don’t even acknowledge that PDP-LABAN was established to oppose the Marcos dictatorship," sabi ni Pimentel, anak ng PDP-Laban founder na si dating Sen. Aquilino "Nene" Pimentel. 

"Time for Comelec to dismiss the petition of these usurpers," dagdag niya.

Samantala, nagpasalamat naman ang Marcos camp sa endorsement ng Cusi wing. 

"It is truly assuring but at the same time challenging us to be even more prepared," ani Vic Rodriguez, spokesman ni Marcos.

-- May mga ulat nina Job Manahan at Bianca Dava, ABS-CBN News

Bisitahin ang Patrol.PH para sa iba pang mga balita.