PatrolPH

Mag-mask sa loob ng bahay kung may kasama: DOH

Jekki Pascual, ABS-CBN News

Posted at Mar 21 2021 12:18 PM

MAYNILA – Nag-abiso ang Department of Health (DOH) sa publiko na magsuot ng face mask sa loob ng bahay kung may mga kasama, sa harap ng tumataas na bilang ng mga kaso ng COVID-19 sa bansa.

Sa isang advisory na inilabas gabi ng Sabado, nagbigay ng 5 rekomendasyon ang DOH para sundin ng taumbayan upang maiwasang mahawahan ng COVID-19.

Isa umano rito ang pagsuot ng face mask sa loob ng bahay kapag may kasamang ibang tao sa bahay.

Dapat aniyang nakasuot ng face mask kahit sa bahay, lalo na kung may kasamang vulnerable o ‘yong may mga sakit o matatanda.

Ayon pa sa DOH, kailangan ding umiwas sa non-essential travel, na nangangahulugang dapat stay at home muna ang publiko kung hindi naman mahalaga ang lakad.

Dapat ang bahay ay may maayos din umanong air circulation, na puwedeng makamit sa pamamagitan ng pagbubukas ng bintana at pagkakaroon ng electric fan.

Nagpaalala rin ang DOH na mag-report agad sa doctor kung may maranasan mang sintomas ng COVID-19 para malaman kung kailangan bang mag-isolate o mag-quarantine.

Nagpaalala rin ang DOH na kung makaranas ng mild symptoms ng sakit, sa isolation facility dapat dumeretso sa halip na sa ospital.

Napupuno na raw kasi ang ilang ospital—na para lang sa severe cases—ng COVID-19 patients.

Inilabas ng DOH ang abiso matapos maitala ang 7,999 bagong kaso ng COVID-19 nitong Sabado, ang pinakamataas na single-day tally mula nang mag-umpisa ang pandemya.

Nagpaalala rin ang DOH sa publiko na huwag nang lumabas ng bahay sa Holy Week at mag-online mass na lang muna.

RELATED VIDEO:

Watch more on iWantTFC
Bisitahin ang Patrol.PH para sa iba pang mga balita.