PatrolPH

3 patay sa gumuhong gusali sa Maynila

Jekki Pascual at Bianca Dava, ABS-CBN News

Posted at Mar 21 2021 08:00 AM | Updated as of Mar 21 2021 05:56 PM

3 patay sa gumuhong gusali sa Maynila 1
Patay ang 3 lalaki matapos ma-trap sa gumuhong gusali sa Maynila nitong Marso 20, 2021. Retrato mula sa Manila Disaster and Risk Reduction Management Office.

MAYNILA (UPDATE) – Patay ang 3 tao habang 2 ang sugatan matapos gumuho ang tinitibag na gusali sa Ermita, Maynila noong Sabado.

Kinumpirma ni Manila Disaster Risk Reduction Management Office head Arnel Angeles ang pagkamatay ng 3 lalaki sa gusali sa may Maria Orosa Street at United Nations Avenue.

Bandang alas-11 ng umaga noong Sabado nang gumuho ang basement at first floor ng 6 na palapag na gusali, na dating Philam Life Building.

Sa 5 taong na-trap, nasagip noong gabi ng Sabado ang 2.

Magdamag nagsagawa ng retrieval operation ang mga awtoridad at nitong umaga ng Linggo, nakuha ang bangkay ng 3 natirang biktima.

Watch more on iWantTFC

Inaalam pa ang sanhi ng pagguho pero ayon sa imbestigador na si Capt. Henry Navarro ng Manila Police District Homicide Section, mananagot ang contractor at subcontractor.

"Kung makita natin na in the course ng kanilang operation, may nakitang kapabayaan, maari silang maging liable through reckless imprudence resulting in multiple homicide and serious physical injuries. File natin ang subcontractor at safety officer," ani Navarro.

Nagtataka ang mga pulis kung bakit alas-5 ng hapon o 6 na oras ang pinalmpas bago ini-report sa kanila ang pagguho.

Ayon kay Angeles, posibleng lumambot ang lupang kinatatayuan ng gusali dahil sa pag-ulan kaya sa gitna ng pagtitibag ay tumagilid ito.

Suspendido muna ang demolisyon ng gusali habang isinasagawa ang imbestigasyon, ani Angeles.

Watch more on iWantTFC

Nangako naman umano ang contractor at subcontractor na tutulungan nila ang pamilya ng mga biktima.

"Willing naman sila na lahat ng damage sa mga kamag-anak, willing sila tulungan," ani Aleyah Bidua, chairperson ng Barangay 670.

Sinubukan ng ABS-CBN News na kunin ang panig ng SM Development Corp. (SMDC) pero wala pa silang pahayag sa ngayon.

Una nang sinabi ng SMDC noong nakaraang taon na balak nilang i-replicate ang "iconic facade" ng Philam Life Building sa itatayong bagong gusali, gamit pa rin ang mga orihinal na materyales.

Pinuntahan ng ABS-CBN News ang bahay ng subcontractor para kuhananan ng pahayag pero wala umanong awtorisadong magsalita sa media.

Bisitahin ang Patrol.PH para sa iba pang mga balita.